An tëm taach, uf fiile plets fon te welt, tuut mer fayre was ti fraae xon in te sosial, politixe un ekonoomixe aarea konkisteyert hon iwer ti yoore.
Ti ONU hot tee taach aan kesaat in 1977 un, fon too aan foran, hon meere natsioone ti fayrung aan kenom.
Te Fraae Taach kept oft torich simpoolixe kexënke erinert, wii pluume ore poesii, awer tas wil petayte tas tii fraae unser rexpekt hon.
Kompetëns hot ti fraa hiin kenom uf ale plets, rexpekt fertiine un mee un heecher treme khëne.
Hayt tsuu taach is ti fraa iweraal presënt un tii presëns multiplitseyert sich in yeete aarwat xtel un yeete traum woo realiseyert kept.
Tii fraa woo ti tsayt kelërnt hat tas leewe se liipe un te khamf net uf se kewe, sonst wën se etwas ferloer hot, noch mool frix aan fange. Klaawe an mënxliche weyerte un optimistix sin.
Ti fraa klaapt an ti kroos Kraft, woo ti mënxlich familye foer heyer pringt. Sii klaapt an te pelaychente xtroom fon te mënxlich solitariteet, tas mer khan iwer ti ti feeler un propleeme khome. Ti wees tas fiil se khëmfe is un niks laycht pay keprung kept..
Sii hat ti kraft, aarwat, emotsioon, haus un hëm … is mayster in te liipe khunst.
Is tii woo uns flite kept un uns ans fliye pringt, is tii woo sich emotsioneyert wën meyer tsum horisont fom leewe fon tehëm fort keen.
Yeete ëne fon uns hot en fraa in sayn leewe: ti mama, ti wowo, en xwester, ti eefraa, en tochter… Un yeete ëne wees wii important fer ti familye, fer ti kemaynte un fer ti kans welt se ferpesere yeete fraa is.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com