Meyer sin kans froo tas mer mit aych fayre khëne ti 13 YOER KEPOERS TAACH fom Proyekt Hunsrik , woo im feepruer 2004 aan kefang hot se xafe mit unser moter xprooch – te Hunsrik-Plat Taytx.
Unser aarwat hot aan kefang wii ti Sociedade Internacional de Linguística tray linkwiste kexikt hot, woo Dra. Úrsula Wiesemann koorteneyert hot. Tëm noo is sii finef yoer hier im Thee Walt woone keplip fer ti xrift fon unser xprooch fërtich mache in tetails, was soo kuut klape tuut un soo laycht is fer ti khiner se leese tas meyer uns imer noch oft fewunere: tii is en jeenius.
In 2007 hot sii unser xprooch inkexrip im Ethnologue, orkaan fon te UNESCO woo ti kanse xprooche fon te welt katalokiseyert als en leewent xermaanix xprooch fon Latiin Amëërika, woo uns te khoote HRX kep hot. Dra. Úrsula hot aach en sientific aarwat puplitseyert in te Internet woo scientific basis fer unser aarwat kewe tuut.
Im selwiche yoer 2007 hon mer partnerxaft kemach mit te Sociedade Bíblica do Brasil, woo pis hayt halt fer te Naye Testamënt iwersetse un aach anere picher, wii piipel kexichter fer khiner.
In 2010 hon mer unser eyerxt puch aus kep, te Tiksionar fer Khiner, un fon too aan foran yeetes yoer en puch ore mee wii ëns.
In 2011 hon mer unser eyerxte Seminaar fer Leerine kehal un aach aan kefang xuul se hale.
In 2012 hon mer ti Xtaat Kesets kemach kriit woo unser xprooch als Histoorix un Kultural Ërepxaft fom Xtaat RS aan saat.
In 2014 sin mer inkelaat kep fer “Te Kleene Prins” iwersetse, was uns wayt un prayt pekhant kemach hot, un tësweche, sin mer in 2015 es
eyerxte mool inkelaat kep fer mit hale im “FESTIVAL MIR REDDE PLATT” un woo, foriches yoer, meyer te haupste theema waare fon tëm Festival, in Franraych.
In 2016 hon mer Seminaar fer Leerine kehal in te xtat Estância Velha, woo aan kefang hot xuul se hale fer 11 xuule mit 1.700 khiner in te 1. pis 5. klas. Un noch en puch kemach kriit = Mayn Liipste Kexichtcher.
In 2017 tuun mer wayter klope: Meyer wole noch mool noo Frankraych fliye, fer uf em FESTIVAL fon unser xprooch es 3. mool mit hale. Meyer sin flot am xafe fer unser nay puch fërtich pringe, “Mayn Liipste Kexichtcher II”, woo 12 leerine fon Estância Velha iwersetst hon un meyer sin tas kraat yets am korijiire fer samer fase un unerxtitsung am suuche tas mer tas ketrukt kriin.
Soo keet es leewe wayter, mit fiil aarwat un kroos hofnung, tas unser xeen xprooch sich imer mee ufmuntere tuut torich ayer familie, ayer froyntxaft un fiile krupe woo mitsamer fertseele tas unser tausent yeerich xprooch net ferloer keet un sayn komunikatsioon funktsioon sich wayter halt.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com