In feepruer 2004, sin 3 linkwiste fom SIL Internacional hier aan khom fer en xrift mache fer ti xermaanix xprooch woo noch etwa 3.000.000 mënxe im Brasil xpreche, ti tswet xprooch woo te meyerxt kexproch kept in unser lant;
Was sin ti opjektiife fom Proyekt¿ Unser moter xprooch fleechte, xtërke un erhale.
1.Unser Proyekt hot ti xprooch rejistriert im Ethnologue – Orkaan fon te Unesco, woo ale xprooche fom Planet katalokisiert un in teetsëmper 2007 hon mer te Khoote HRX kriit als en leewent Xermaanix Xprooch fon Siit Amëërika;
2. Meyer hon ti Kesets fon Histoorix un Kultural Ërepxaft torich te Deputado João Fischer – Fixinha ferlangt in Akust 2011 un in yuuli 2012 hot te kowerneyer ti Xtaats Kesets Nr.14.061 xon unertsaychent;
3. Meyer hon xon phaar picher puplitseyert, woo aach als titaktix-petakokixe material tiint, sokaar ti xrift reechle, puplitseyert in te Internet woo xon penutst kewe in kroose umfang pay xprecher im kanse Brasil, Paraguay un Argentinie , sokaar fer ti ofitsial iwersetsung fon te Piipel fer ti Soc. Biblica do Brasil;
4. Meyer hon Seminaare fer Leerer in Santa Maria do Herval un Estância Velha kehal, kemaynte woo ti Hunsrik – Plat Taytx Xprooch xon in te xuule peaarwate;
5. Meyer hon in mee wii 30 puch mese mit kehal in te rechioon, sokaar 4 in Porto Alegre, imer mit naye Picher am aus kewe un mit foerxtelunge iwich unser aarwat;
6. Meyer hon teil kenom im “FESTIVAL MIR REDDE PLATT” in Sarreguemines-FRANKREICH, ti 3 letste yoore, woo imer mit puch mese xlus macht, noore fer autore fon unser xprooch. In 2016 waare meyer te THEMA fon tëm Festiwal. Meyer sin xon noch mool inkelaat kep fer tas yoer.
7.Meyer sin yets inkelaat kep fer mit hale im Bosener Krupe, fom 01-06maay, was kans important is fer ti kanse mënxe woo mit unser moter xprooch xafe in ferxiitne lëner, wii ich aych xon ti taache fertseelt hat.
Soo, unser 14 yoer eksistëns, mit fiil aarwat fer ti moter xprooch fon unser folek hiin pringe als en xprooch fon Siit Amëërika un net mee ploos en tialiekt, ti fiile picher woo mer xon puplitseyert hon, ti xprooch in ti xuule pringe, puplitseerunge in tsaytunge un raatios un fiil mee, ales wole meyer mit aych tayle als en kroos frayt,
ekstra fer unser tausent yeerich ërepxaft wayter liwre fer unser khiner un ënkels khiner.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com