Museolojii wërt hayt tsuu taach als en praxis in te tiinst fom leewe pekhant.
Museen sin instituitsioone oone fertiinst, woo uf heepe, komunikeere, interpreteere un tsayche, fer ti erhalung, xtuutium, forxung ore pesquisas, piltung, kontemplatsioon un turismus, fon historixe, khinstlerixe ore artistike samlunge, wisenxaftliche, teknixe ore anere kulturaale natuer, fer te kemaynte tiinst.
Te Museum is tas plats woo kefiils, foerxtelunge, itee un imaaje ausxtraale fon te kesamelte referëns opjëkte woo esensiaale weyerte fer ti mënxe laychte.
Fasinant plats, woo mer entëke un lërne, woo mer te khëntnis ferprayt un ti konsiëns fon itentiteet, fom tayle un fon solitariteet fertiife khan.
Torich ti Museum tuut sich tas sosiaale leewe noch mool in hoole, ti mënxlich timensioon woo in te ayl fon te tsayte ferkeet.
Is es plats woo ti xtët sayne xpiichel fine woo sayn kesicht tsaycht in te taachlich turpulëns. Un yeete persoon woo in en museum kuut ap kehool kept, kriit en pisye mee fon sich selepst khëne lërne.
Ich xafe xon 11 yoer in en Museum, un fiile mich kliklich, wayl tesweche hon ich hunerte wunerliche mënxe khëne kelërnt, woo sich khimere mit te khiner un mit te mënxheet, mit sayn itetiteet, mit sayn nookhomer, mit sayn xtët un mit sayn natsioon, un noch fiile sorte persoone woo ti peste sentimënte aus tuun torich sayn aarwat fer ti layt pertiine un hëlfe in fiile sorte xtuutium.
Tanke xeen fer aych al woo sich an kultur intereseere.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com