Lange moonate kepleent, fiile taache truf kewaat un, ëntlichmool, khome meyer, am letste 24 april, sontachs mitachs, an ti xtat Eisenach, tort woo te Xlos Wartburg knas xtols uf em përich xteet.
Warom is tee xlos ore tii xtat soo famoos¿ Wayl tort, 500 yoer tsurik, Martinho Lutero ti Piipel uf ti taytxe xprooche iwersetst hot.
Meyer, fom Proyekt Hunsrik, sin aach ti Piipel am iwersetse, wii ich aych xon oft fertseelt hon. Tas is en aarwat woo meyer am mache sin fer ti Sociedade Bíblica do Brasil.
Awer, tas yoer 2017, woo uf te kans welt ti 500 yoer fon Luther sayn iwersetsung kefayert kept, hon ich ketënkt tas weyer – kraat tesweche, en kans important pesuuch fer se mache wën meyer noch mool in Taytxlant waare.
Hot uns fiil emotsioneyert in tas tsimer rin keen woo eyer kexaft hot, ti piplioyek kuke mit tëne uer alte picher, soo kuut uf kepast, un ekstra, pekhepe wii important tëm sayn aarwat is fer ti kans mënxheet.
In 1522 is te Naye Testamënt es eyerxte mool puplitseyert kep un 12 yoer tëm noo is ti Piipel kans ketrukt kep.
Ti iwersetsung fer an enere xprooche woo net te “grego” ore “latim” waare, is en aptaylung fer ti intelektuaale kexichte fon te mënxheet.
Meyer sin kans froo tas meyer aach, mit em Proyekt Hunsrik, tas fayre khëne.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com