Te Alte Testamënt is te selwiche fer ti kriste un fer ti yute. Un te Naye Testamënt is en puch fer ti kriste.
Ti Piipel komplët is xon uf 636 xprooche iwersetst kep. Un te Naye Testamënt is xon uf 1442 xprooche iwersetst kep. 100 milioone piiple kewe yeetes yoer ferkhaaf uf te kans welt. Tas petayt tas 95% fon te mënxe fom planet hayt ti keleechenheet hon fer ti Piipel leese khëne in en pekhant xprooch.
Ti Piipel is, kans sicher, tas puch woo te kreeste histoorixe efekt hot in ale tsayte. Hot kultuure kepilt, hot foleke inspireyert mit sayn wisheet, hot te kayst fon fiile xeneratsioone formeyert.
Ti Piipel is net ploos en klaawe foerxlaach, awer aach en sosiaal proyekt.
Foriches yoer sin ti 500 Yoer fon Lutero sayn iwersetsung uf ti taytx xprooch kefayer kep.
Tsayt 2007 hot te Proyekt Hunsrik en partnerxaft mit Sociedade Bíblica do Brasil-SBB, un fon too aan foran hon meyer xon phaar khurse kemach fer piiplix iwersetsung se lërne, torich te Konsultant Prof. Dr. Vilson Scholz, woo ti kans welt torich reest fer ti iwersetsung equipes in iipe. Meyer hon aach phaar picher fer khiner un piiplixe kexichte xon iwersetst un puplitseyert, fiile proyekte mit xuule, secretarias de educação un prefektuure mit tee partnerxaft peaarwat, in neekst 40 Feiras do Livro.
Hayt sin meyer kans froo wayl, yets am 30 septëmper, hon mer unser iwersetsung fom Ewankeelium fon Mateus ap kep fer ti SBB, mit 28 kapitle, was tayl is fon en proyekt fer te Naye Testamënt fërtich iwersetse in te neekste tswaay yoer. Ti Ewankeeliums fon Lukas unYohan waare xon ap kep waar, was ich aych xon fertseelt hat. Soo langsam, khome meyer ticht ans ën fom Naye Testamënt, was uns arich fiil fraye tuut. Tan wërt ales noch mool frix aan fange mit tëm Alte Testamënt, woo fiil kreeser is.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04