Kept imer am 4ª tonerxtach in noofëmper kefayert, als kristlich fayerlichkheet fer unser kuute ërnte tanke, noo te ërnt fon was mer keplanst hot.
Hier, pay uns, kewe ti ërnt feste ore tank feste kefayert tswixe mërts un yuuli, unser ërnt tsayt ore hërpst, wën ti luteraanixe kemaynte kans xtarek tii festlichkheete noch peoopachte, tsayt frier aan.
Ich tanke tich, mayn Kot, fer unser raychliches es mitel,
fer ti luft woo mich leewe macht,
Fer ti wunerlich xeen natuer, woo ich fasiniert aan kuke;
Ich tanke tich fer unser klaytung, fer tas taachliche proot,
Woos Tuu uns kepst, als Fater woo sayn khiner uf past.
Tanke, mayne Hër,
Fer tas Leewe, fer te Liipe, fer ti Friite,
Fer tas xeenste kexënk: en naye taach;
Fer ti xpetsieele layt woo uns trefe iwer te weech fom leewe;
Un aach fer ales un ale mënxe …
An tëm Welts Tank Taach
Kuke ich noo em himel iwich uns,
Un tanke tich, Kot, fer ti fiile knaate woos Tuu uns kep hast.
Tanke Xeen, Hër!
Is wunerlich tiine khëne un tanke khëne!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04