Fom lataynix, tas wort relichioon mënt religare un petayt ti ferpintung fom mënx restaureere mit em hayliche uniwërs torich em klaawe, was sich ferprayt in ale ferxiitne klaawe ore relichioone.
Ti relichioon is tepay un konforteyert ti mënxheet tsayt fom aanfang aan un is aach soo fiil kultural wii teknolookix ewoluiert mit te mënxheet. Neekst al ti relichioone fersuuche, in sayn esëns, an te selwiche opjektiif aan khome: ti FRIITE un te REXPEKT unich te mënxe un ti natuer fortere, un te tialook unich aler ferxiitne relichioone un foleke woo es uf te welt kept, un woo unterichte tas ti mënxe kuut mise sin ëne fer te anere.
Ti itee is tas friitliche tsusamer leewe aan piite unich te natsioone un ti intolerans tsurik lose, weche te fiile kriiche woo soo oft aanfang kep sin, wayl ti relichioose theeme imer te uersach waare fer ti xlimste kriiche un konflikte woo ti mënxheet in ale tsayte erleept hat. Ti relichioone woo te meyerxt mitkliiter hon uf te welt sin: 1°- Kristentum (+ – 2,2 pilioone mënxe) 2º – Islamismus (+ – 1,6 pillioone mënxe) 3º – Hintuismus (+ – 900 milioone mënxe), was mee wii ti heleft fon te mënxheet is.
In ale rechioone fon unser planet leewe mënxe neewich naner mit ferxiitne relichioose tratitsioone. Ti kroos forterung is ti unerxiite fom anere aan nëme un tas in tialook transformeere un torich ti meechlichkheete fom leewe tas peaarwate un in harmonii ferënere. An tëm taach wole mer aach te mënxliche potensial fayre fer tas kotliche fer sayn leewe winxe un aan hoole, un too torich en peser welt uf paue, tas te liipe xtërker kept wii te has un tas leewe xtërker wii te toot.
Meyer mise lërne te anere sayn ketanke rexpekteere; te anere sayn frayheet rexpekteere; te anere sayn relichioon un klaawe rexpekteere. Hayt tsuu taach, mit tëm intensiif mikratsioons protses un ti globalisiirung is ti welt multi-relichioos. Ti meyerxte relichioone reflekteere te xtraal fon te WOERHEET woo ale mënxe ans licht pringe wil. Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04