Meyer sin kans xtols fer aych se fertseele tas mer yets, im moonat feepruer, unser 15 yoer krintung am fayre sin.
Tsayt feepruer 2004 – 15 Yoer xon heyer, woo te Proyekt Hunsrik xaft fer ti Hunsrik – Plat Tayxt xprooch erhale un xtërkere, was en xermaanix xprooch is, woo umkefeyer tray milioone mënxe noch im Brasil xpreche un is ti 2ª xprooch woo te meyerxt kexproch kept in unser lant.
Meyer sin kans froo fer aych en kleen liste pringe fon aarwate woo meyer important fine un xon fërtich keprung hon, phaar fon tëne woo meyer noch am realisere sin:
1.Unser Proyekt hot en xrift ketsoo un hot ti Xprooch in kexrip im Ethnolook, orkaan fon te Unesco woo aler xprooche fom planet rejistreyert , un meyer hon te Rejister HRX kriit in teetsëmper-2007 als Xermaanix Lewent Xprooch fon Latiin Amëërika;
2. Meyer hon ferlangt tas unser Xprooch en Histoorix un Kultural Ërepxaft fom Xtaat Rio Grande do Sul in kesetst keept, un te Deputado João Fischer-Fixinha, hot fon Akust 2011 pis Yuuli 2012 tas in te Assembléia Legislativa koorteneyert, un te Kowerneyer hot tas Xtaats Kesets Nr. 14.061 tan unertsaychent;
3.Tsayt 2012, sin mer ti Piipel am iwersetse, in en partnerxaft mit Sociedade Bíblica do Brasil, was uns fiil xtolseyert, wayl tas is khee kleen aarwat! Te Naye Testamënt sol fërtich kewe pis neekstes yoer un tayle kewe xon ausketaylt fer khëriche un entiteete woo mit em folek xafe;
3. Meyer hon tseen picher un noch anere puplikatsioone, woo als titaktik-petakoojike material tiint, un noch ti reechle woo Profa. Dra. Ursula Wiesemann, fon te Soc. International de Linguística, in te Internët puplitseyert hot un woo xon am penutst kewe sin pay ti taytxe nookhomer im kanse Brasil, Paraguay, Argentina un Venezuela;
4.Meyer hon Seminaare fer Leerine kwalifitseere prepareyert in te rechioon un tuun too wayter traan xafe, tas unser xprooch imer mee in te xuule kelërnt kewe khan;
5.Meyer hale xon xuul tsayt 2011, fer khiner fon te 1º pis 5º klas un sin imer am xafe tas mee xtet tas aanfange se mache;
6.Meyer hon in neekst 40 Feiras do Livro mit kehal in te rechioon, sokaar uf 4 Feiras fon Porto Alegre, woo ploos mit hale khan weyer en nay puch in tëm selwiche yoer puplitseyert hot, aach mit foextelunge, un noch uf em “FESTIWAL MIR REDDE PLATT” mit kehal, in Sarreguemines-Frankraych, 4 yoer te ray noo, woo imer xlus kemach kept mit en Puch Mese ekstra fer autoore fon unser xprooch, woo fon phaar natsioone khome. In 2016 waare meyer te Thema fon tëm Festiwal.
7.Meyer hon foextelunge kemach in ferxiitne uniwersiteete, liceus, Kultural Centre in Frankraych, ekstra in Elsass un Lothringen, in Taytxlant un in te Linkwístik Uniwersiteet fon Wiena, fer xtutënte woo sayn Master Aarwat in Linkwistik am mache sin.
Unser interese hot sayne haupt phunkt in munisipe woo ti nookhomer noch unser xprooch xpreche, fer in partnerxaft xafe in proyekte fer unser kroos kultural tiwersiteet xtërkere un aach unser kultural ërepxaft pehale.
Kans, kans tankpaar tas teyer, unser froynte heerer, soo liip sayt un uns aan heyert un ayer acht uns kept tsayt 2010 in tëm prokram AHAI, woo aach en important partnerxaft is fer unser Proyekt, uns pekhant macht uf soo fiile rechioone fon unser riisiche kroose Brasil.
Froyntliche un frooe kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04