Am 18feepruer, iwer unser 15 Yoer keportstaach moonat hon mer, fol mit frayt, en foerxtelung kemach fer te kroose krupe fon 400 leerer un leerine fom munisip, un te prefekt, vice-prefekt un phaar khamer konseliere un noch ti kans equipe fon te Secretaria de Educação hon aach mit kehal.
Am ën fon unser haupst foerxtelung, hon mer unser nay puch aach tëne presenteyert un hon unser 11 picher un anere puplikatsioone fer ti pipliotëke fon tëne iire xuule ap kep.
Professor Dr. Vilson Scholz un ti Gerente de Administração fon de SBB-RS hon uns aach ti eere kep fer mit se hale in tëm moment, weche te auskepung fon tëm naye puch, woo meyer in partnerxaft mit te SBB am puplitseere sin.
In Nova Hartz petiine ti xuule 4.000 xiiler, un meyer hon 20 xtun seminaar kehal fer 14 leerine, woo mit uns sich kefrayht hon iwer ti fiile khëntnise iwer xprooche un ekstra iwer unser xeen Hunsrik Xprooch. Hon sich aankextrëngt fer ales kuut se lërne tas sayn xiiler aach sich fraye khëne mit sayn kultural ërepxaft un unser kexichte, tëne iire familye sayn kexicht xtuteere un pehale khëne un mit sayn familye ti kulturaale wortsle fleechte.
Ti autoriteete woo too pay uns mit kehal hon, hon ferxproch teere ti kesets klaych torich fiire in te munisipal khamer, tas ti xuule fer fiile yoore helfe khëne tëm munisip sayn kultural itentiteet xtërkere un preserweyert playwe fer ti neekste xeneratsioone.
Is tas ore is tas net en fatastixe Nay Yoer aanfang!!!
Soo, wole meyer ti inwooner fon Nova Hartz kratuleere, kraat soo wii tëne iire Prefekt un Piltungs Setreteyer, weche tee important pextimung fer ti kultural itentiteet fon sayne munisip fersichere fer tëne iire nookhomer.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04