Ti friilings tsayt petayt te ën fon en xwiirich tsayt – te winter, un ti renoweerung in en noy etape. Ti yute hon aach tas Pesah Fest xon foer Yeesus sayn kepoer kefayert. Tee taach hot ti Frayheet petayt noo 400 yoore sklaweray im Egypt. Tas wort Pesah Fest petayt uf hepreyix “Pasaaj”.
Fer ti Kristentum woo hayt tee taach uf te kans welt fayert, hat Oostre en aner petaytung: te toot un ti uf xtayung fon Yeesus Kristus.
Tan, Oostre mënt witer kepoer un iwer keen fom alte tsum noye, is ferënerung un transformatsioon. Is sich noy mache aus sayn aychne pefrayung. Is tsurik lose was uns net mee tiint, un en noy rays aanfange, woo torich Kristus sayn licht pelaycht kept, woo yets in uns peleept is un te weech fiert un ti hofnunge renowiert.
Ti fayerlichkheete sin uf te kans welt etwas anerxter un aach ti simpoole sin unerxiitlich, awer Oostre is en taach woo uns an ti refleksioon un renoweerung fon unsere tiifste winxe hiin fiert.
Ti Oostre leewe is uns inspireere im heechste payxpiil fon tëm woo sich keopfert hat fer uns se rete un unser hërts uf mache fer tas noye un too truf unser klaawe xtele.
Tas meyer al in Kristus sayn peleepung inspiratsioon fine un motiwatsioon fer unser leewe too traan ap pilte khëne.
Oostre is helfe mee layt mënx sin, is in konstant pefrayung leewe, is klaawe an tas leewe woo fom toot kewine tuut.
Oostre is witer kepoer kewe, es is en noye aanfang, es is en noy xans fer uns tas tings se ferpesere, woo meyer an uns selepst net kërn hot.
Tas te payxpiil fon klaawe un liipe tsu te mënxe woo Kristus uns lërne khom is, uns te weech wayst un uns fiire sol.
Tas an tee Oostre ales in ayerem leewe renoweyert kept un tas ayre weech pelaycht kept fom leewente Kristus un, es haupste, tas mer traan tënke tas es en Hërkot kept woo kextorep is fer uns se rete.
Xeene kruus aus Thee Walt
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04