Te haupt phunkt fon tee trefung waar ti petaylung un partisipatsioon fon te kemaynte an te erhalung fon te kultural ërpxaft.
In tëne tswaay taache hon fiile importante leerer un anere profisionaale woo mit kultur, histoorixe kexichte, preserwatsioon un noch fiile theemas xafe kexproch ore foerxtelunge kemach iwich naye sorte ërepxafte, inwentaare, itentifitseerung, erhalung un entwiklung fon te kultur, un noch iwer finansiirung, tas unser aarwat wayter kemach kewe khan.
Kans interesant waar aach, iwer ti tswaay taache, mit fiile pekhante un importante layt fertseele iwich unser kultur, wii histooriker, xraywer, leerer, layt woo sich khimere mit ales was unser kultur aan keet in ale sektoore.
Kraat wii tas wort saat: xtaats fersamlung, un soo waar es ach paseyert. Fiile trefunge un fiil ferprechunge, fiile pleen fer in khorts tsayt uns noch mool pekeechne, in ferxiitne naye trefunge tas yeete ëne sayn tayl mache khan tas unser kultur xtarek wayter kehal kewe sol.
Tsum xlus, sin fiile phunke kexrip un keweelt kep fer en kroose “Priif fon Osório” xraywe fer ti autoriteete un kowerneyer, woo aus ketaylt kewe sol als tsayer fon unser aarwat fer ti Kultural Ërepxaft erhale – ekstra im Xtaat Rio Grande do Sul, awer aach im kanse Brasil.
Tswaay woche truf, yets am samstach 11maay, soo wii mer pextimt hate, hon mer xon persoone witer ketrof woo sayn aarwat mit te Talian Xprooch mache, tas mer mitsamer xafe fer etwas fërtich pringe mit te xtaats rechiirung, filaycht en puplik audiëns ore aanheerung mit te xtaats teputaate fon te Assembléia Legislativa fer unser xprooche in ti krunt xuule hiin pringe, was kans important weyer fer ti xprooche leewent hale.
Kuute naychkheete, kël?
Xeene kruus aus Thee Walt.