Meyer xpreche too triwer wayl ti woch sin ti 204 yoore fon tëm memoraawel khamf erinert kep, woo unkefeyer 200.000 soltaate tayl kenom hon un tausente fon tëne sin too kextorep, uf payte sayte.
Foer alem, wayl fiile fon unsere inwanerer tii un noch anere kriichs eksperiënse mit kemach hate un pextimt Europa hinerlose un noo en noy lant se suuche, woo filaycht fray weyer fon kriiche un soo fiil phayn woo ti kriiche mit pringe.
Meyer hon fiile soltaate rejistreyert als krunt pesitser in te xermaanixe kholonie fon unser iner lant, woo in ferxiitene epoke khom sin, woo foerfaare fon unsere xermaanixe familye sin. Fiile fon tëne familye pehale imer noch pis hayt ti militaarixe khëntnise fon sayn uer kroos eltre, wii, tsum payxpiil, pau tëknike, pextek ore cutelaria, metalkus, usw.
Mathias Mombach, eene fon te krinter fon Wallachei, Peter Schneider, krinter fon Picada Schneider, un Mathias Simon, eene fon te krinter fon S.José do Hortêncio un Feliz, woo aach an tee important xlacht mit kehal hon un kraat soo, te Coronel Hillebrand, woo tort aach mit kehal hot un tan 20 yoer alt waar. Nochter, too hier, waar Cel. Hillebrand te Tirektor fon te Kholonii, un tii pekhante un alte soltaate hon iim unerxtitst in te kriiche, wii in te Farroupilha-Rewolutsioon. Hon uf te sayt fon te Imperiale kekhëmft un aach anere xermaanixe nookhomer hon im Paraguay kriich als Voluntários da Pátria -Fraywiliche fom Haymat Lant ketiint. Cel. Hillebrandt waar Tokter un Tirektor pis 1880, wii eyer kextorep is.
Ich xtele mich foer tas aach in te atministratsioon fon te kemaynte tii mëner starke aarme waare fer ti friite un ortnung in te kholonie hale, woo soo kroos waar, tas ti Kholonii São Leopoldo etwa 40 kemaynte emansipiert hot. Kans sicher praucht te Coronel Hillebrandt hilef fer ti orkanisatsioon fon soo fiile neetichkheete.
Fer mich is aach klaar, tas woo mee meyer unser kexichte un ti kexichte.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04