Tesweche hon ich auskekluucht tas am 02 oktoower te Xuts Ëngel Taach is. Too hon ich tas pekhante kepeetche fom Xuts Ëngel iwersetst, en phaar fikuurcher fon ëngelcher fer ti khiner se fërwe kesamelt un hon tas in format fon en pichelche fer ti khiner presenteyert.
Tan hon ich moynts ti eyerxt klas ketrof , hon mit tëne tas Xuts Ëngel kepeetche kepeet, un ti kanse khiner hon tas kekhënt, awer een puupche hot es fingerche kextrekt un saat:
-Leerin, ich peete net tas kepeetche: mayn wowo hot mich en aneres kelërnt.
-Wërklich?, saat ich. Tan peet mool tas was tuu imer peete tuust!
Un eyer hot, kans xtols, en anerxter kepeetche uns runer kepeet.
Tan saat ich xon, xnël: – Waat, meyer xraywe tas uf! Un ich hon tas ap kopiert uf ti thaafel un saat fer ti khiner solte tas aach in tas pichelche rin xraywe.
Tan hon ich kexikt solte fer sayn familye frooe was fer anere kepeetcher se khëne teere un solte tas ins kleen puch xraywe als haus ufkaape.
In te neekst klas hon mer xon noch noye kepeetcher khëne kelërnt un, pis ich ti kanse thurme torich hat in en woch, hate mer xon soo fiil naychkheete, tas mer ti itee kefleecht hon fer en xeen puch xraywe iwer ti ëngle.
-en Ëngel hot Aatam un Eewa aus em Paratiis keyaat;
-en Ëngel hot Aapraham sayn hant fest kehal fer net Iisak se opfere;
-en Ëngel hot Yeesus sayn kepoer aan kesaat fer Mariia;
Weest tuu wii oft tas wort “ëngel” in te Piipel kexrip is? 313 mool.
Yeete ëne fon uns hot sayne Xuts Ëngel. Yeete xtaat un Natsioon hot sayne aychne Xuts Ëngel.
Es kept noyn ëngels orte, woo in tray hierarkie fertaylt sin:
1º Hierarkii: Is formeyert fon te heechste Hayliche Ëngle, woo in ënge kontakt mit Hërkot xteen. Tas sin ti Serafim, Kerupim un Troone.
2° Hierarkii: Hërxafte, Mechte un Virtues, tas sin ti Hayliche Ëngle woo ti pleen fon te Eewich Wisheet fiire un tii proyekte fer ti ëngle fon te 3º Hierarkii aus tayle, was tan ti Prinse, Ërtsëngle un Ëngle sin, tii woo ti mënxheet un unser welt uf pase.
Tas is kans wunerlich too triwer xtuteere, khan mer fiil iwer ti welt ferxteen, woo te liiwe Hërkot fer uns kepleent hot un soo fantastix funsioneere tuut.
Unser puch hot xon mee wii 100 sayte. Palt is es fërtich. Hofe tas mer yemant fine fer tas unerxtitse.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04