Moters Taach – AHAI /HUNSRIK 1395
Haloo, hier is Solange Hamester Johann, fom Proyekt Hunsrik.
Te taytxe filoosofer Friedrich Schlegel saat tas “noore um en fraa woo liipt en familye formeyert kewe khan”.
Mer mus ti petaytung fon te moter fer en familye erkhëne! Ale familye woo en
fraa ticht rom hon, sin kans sicher mit liipe un tsaartlichkheet kuut petiint.
En mama is en sichere phayler, xoos fon unkontisionale liipe, lechle un wërter
woo uns peruiche, uns fiire, aarme woo uns konforteere.
Motere sin raychliche ëngle woo uns es leewe kewe, uns uf phase un fer uns
soriche un sich khimere. Sii representeere te kroosaartiche wuner fon te
kriatsioon uf te Eyert; sin te xif woo uns fon te himlix welt tsu tii welt pringe mit
iire layp, un mit iire hërtse uns liipe. Moter is khee thitel, is en kexënk. Es is
ikaal op es torich pluut ore sentimënt is. Mama is imer en seechnung!
Wën es um unser familye un unser Mama keet, sin meyer im hërts noch khiner,
ikaal wii alt mer kewe, mer prauche imer en plats woo mer “hëm” ruufe khëne.
Wayl, oone ti layt woo mer te meyerxt liipe, khëne mer niks aneres wii uns
aleen fiile uf te welt.
Yeete taach hon mer ferlange un prauche mer sayne aue plik, sayne xoos, sayn
wërter fon unëntliche konfort. Yeete taach hon mer neetich sii konsulteere, un
fer phaar minute, sayn tsaartlichkheet se xpiire. Meyer xtolseere uns uf sii, unser
kreest inspiratsioon. Oone sii is niks komplët. Aler loop wëre nii mools kenuuch
sin, um ales se erkhëne was se is un ales was se macht.
Fer ti fraae woo soo fiil petayte in unser leewe, woo yeete taach fer sayn khiner
sich opfere, woo mit em kanse hërts un kans seel liipe, wole meyer tanke,wayl
tii al fer ti ferpeserung fon unser welt sayne paytracht kewe un uf te kans welt te
liipe un altruísmus in lërne un ferprayte tuun.
Mama, tuu hast uns es leewe kep un uns ales pay keprung was mer prauchte.
Tuu hast uns ti wisheet un ti mitle kep fer wayter hiin kliklich se sin. Fer tas
ales, tanke mer tich un wëre unser kanses leewe lang fersuuche ales se eere was
mer fon tich kelërnt hon.
Liip Mama, tuu pist licht wën ti welt tunkel is, un en nort wën mer oone
opjektiif sin, un pist te opjektiif warom mer uf te welt mit en lechle fon oer tsu
oer eksistiire. Tuu pist en konstant presëns, tsaartlichkheet woo net miit kept,
xuts un sicherheet. Fer tich is en triput tsu weenich, wayl tuu host es fertiint tas
tayn khiner tich yeete taach loope un liipe.
Tan, winxe ich en wunerliche xeene taach fer ale Mamas woo sich um sayn
khiner khimere, sich opfere un liipe foer alem!
Xeene kruus aus Thee Walt.
(Bevor Sie das nachfolgende Audio mit dem Kommentar eintragen, notieren Sie sich das Password: 092D3842)
http://discovirtual.terra.com.br/vd.cgi?+_wi=1620416119-23249-393361&_we=13
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com