Solange Hamester Johann
Radiosendung AHAI 1005 – Hunsrik Brasilien-(Hunsrückich)
Haloo, hier is Solange Hamester Johann, fom Proyëkt Hunsrik.
Nët fiil layt hon iwich tee taach kexproch.
Awer, mëyer, woo xafe fer unser xermaanix kultur leewent hale, khëne tee taach nët ferkëse.
Brasil is tas trite lant fon te wëlt woo te mëyerxt xprooche hot un ti trit kreest kulturaal tiwërsiteet.
Kraat tëswëche, wayl mëyer in friite leewe mit soo fiil unerxiite unich unser folek, tuun ti anere foleke fon te wëlt sich ferwunere un wole uns noo mache, ëkstra im rexpëkt woo mëyer fer ti anere kulture, woo anerxter sin wii unser, hiin këwe.
Awer, noch: tas is aach en taach woo mëyer uns en pisye iwerlëye mise, fer unser aychne xermaanix kultur nët ferkëse un leeewent hale.
Yeete ëne fon uns mus sich en pisye aanxtrënge fer ale aspëkte fon unser kultur wayter liwre: musik, tans, fëste, kastronomii, khunst ore artes, klaytung, pau khunst ore arkitëktur, tratitsioone, xprooch, literatur, relichioons kexichte, itëntiteet.
Tas ales samer kerëchënt is unser itëntiteet, sin unsere wortsle…
Yëmant saat xon, tsayt lang hëyer: WËYER KHEE WORTSLE HOT, KHEE ITËNTITEET HOT, HOT KHEE FUTUR!!!
KULTURAL ËREPXAFT is, hayt tsu taach, en important sach woo xon fiil xtutëyert këp is, kraat wayl aus kekluucht këp is tas en persoon te sentimënt hot tas er tsu ëtwas keheere tuut, woo iim sicherheet këpt fon woo er hëyer khomt un noo woo er hiin keen wil.
Xeene kruus aus Thee Walt – Santa Maria do Herval, RS, Brasilien.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equiphunsrik@gmail.com