“Ti importans un petaytung tas ti layt ti Hunsrik Xprooch in iirem Leepenslauf tepay xraywe, ëkstra fer aarwats plëtse.”
• Unsere taytx / hunsrik / plat taytx khëne ore lërne, is en unerxiit hayt tsuu taach fer en aarwat kriin.
Tas macht uns aach ti waksent pëtaytung fon te xermaanixe xprooche in te wëlt opserweere:
Taytx is ti xprooch woo te mëyerxt kexproch wërt in Europa. Ëtwa 120 milioone Europëer xprëche tas als Moter Xprooche ore Familye Xprooche.
Tii layt leewe in Taytxlant, in Schwitserlant, Eesteraych un Luxemburg, in Frankraych, un als xproochliche minoriteete in Bëlgium, Deenmark, Rumeenie, Ungarn un Ruslant.
Es këpt aach natiif xprëcher – ti xermaanixe imikrante, in Latayn Amëërika, in USA un tayle fon Afrika.
Tee woo tswaay xprooche xprëcht wërt imer en kreeser xans hon fer en aarwat fine.
Warom, tan, unser Moter Xprooch – te hunsrik / plat taytx / unser taytx, mee wëyert këwe wën mer pleent lërne ore xafe?
• Fer en important trëp uf paue pis an ti ënglix xprooch, wayl unser xprooch kans eenlich is mit tëne sayn xprooch un mit stantart taytx, wayl tas ales xermaanixe xprooche sin;
• Fer ti xermaanixe folke khëne, iire kultur, ti aart fon tëne iire leewe un wii se tënke. Es këpt khee anere instrumënt auser ti aychne xprooch;
• Unser xprooch is ti feramënt woo mer penutst fer se xafe un woo uns ferpint mit te Wëlt;
• Unsere taytx tiint als prik pis an fiile natsioone in Europa un in te kans wëlt.
• 12% fon te picher woo uf te kans wëlt protutsiert këwe, wëre in xermaanixe xprooche kexrip, oone te ënglix mit tseele.
• Taytx hat sich als inowatiif xprooch fëxt kextëlt aach in te wirtual miitia – Taytx is ti 2º xprooch woo te mëyerxt penutst wërt in te Internët, soo fiil in te kanse sayte wii in ales was kesuucht wërt im Google.
Soo, wëyer kluuch is, këp en kroose wëyert fer sayne plat taytx, woo uns mit te kans wëlt konëktëyert.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com