Ti UNESCO tuut rechiirunge inlaate, piltungs instituitsioone, profisionaal ferayne, organisatsioone fon te siwil keselxaft un ale anere orkanisatsioone, tas ti in sayn aktiwiteete achtung, rexpekt un xitz fer aler xprooche fortere, ekstra fer tii woo in kefoer sin fer ausxterwe, in ale situatsioone fer tas intiwituaal ore kolektiif leewe.
In tëm sin, am letste 18 un 19/feepruer/2016, is noch en Kualifitseerung Seminaar fer ti Hunsrik Xprooch kehal kep, fer ti leerine fon te Munisipaal Xuule fon Estância Velha/RS, fer yets klaych in kesetst kewe, noch in tee woch.
In en khorts tsayt, sole noch anere xuule aach, noo un noo, tas selwiche mache, kraat soo wii tëne iire Centro de Cultura, woo xuul hale sol fer al tii woo unser xprooch lërne xraywe un leese wole.
Soo wii ti leerine, hot aach te Prefekt Waldir Dilkin tas Xtaats Kesets nº14.061 xtuteyert, woo te Proyekt Hunsrik fer ti Xtaat Khamer ferlangt hot un sanktsioneyert kep is im yoer 2012, woo ti Hunsrik/Plat Taytx – unser Moter Xprooch in “Histoorix un Kulturaal Ërepxaft fom Rio Grande do Sul” transformeyert, tas eyer klaych en Munisipaal Kesets mache khan tas tas nime wech khome sol fon te prokrame ore PPPs, wii ti PCNs xon erlaupnis kewe fer ti kanse xuule ore munisipe woo taytx kexproch kept.
Meyer sin noch kans froo wayl ti xtaat xuul Dr. Alberto Schweitzer, in Santa Maria do Herval, aach im “Turno Contrário”, mitachs, Hunsrik xuul hale tuut fer ti kleene khiner, torich unser leerin Mabel Dewes.
Noore wën mer ti Meerxproochichkheet ore plurilinguismo kans aan nëmt, wëre ale xprooche sayn plats kriin in unser klopaliseyert Welt.
Ti xitsung fon te xprooche soricht aach fer ti erhalung un iwertragung fon seltne khëntnise fon te ferxiitne foleke.
Fer yeete fon uns en mitel, fer aankeheyert un respekteyert kewe, is tas aach en kraft fer ti sosiaal inkliiterung.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com