Eyer waar leerer in te UFRGS. Hot uns en puch kexënkt, mit tratitsionaale resepte fom hunsriker folek fom Rio Grande do Sul, woo eyer un sayn fraa Lori iwer te kanse xtaat am reese kesamelt hate, ekstra fer tas puch se xraywe. Tii waare aach iwer ti kans rechioon fom Hunsrück, in Taytxlant, kereest fer tort noo kuke was echt is.
Too, is tas aariche xeenes resepte puch “Redescobrindo a Cozinha Colonial Alemã no RS” raus khom. Ich hon mich fiil emotsioneyert wii ich mayn mama sayn peste resepte too trin kefun hon.
Een, ekstra, fon te “Xteke Poone Sup mit kartofle un kereest meel”, woo meyer imer ketënk hon weyer “Te Mama sayn Sup”, is en echt hunsriker sup.
Un aach ti “Croutons”, was proot fier eckcher sin, keproot in fet ore eel, fer iwer ti sup xtraue, sin kans thipix fom hunsrik, awer aach fon Alsácia un Lorena, in Frankraych, woo ich se erkhënt hon, kraat soo wii mayn mama se imer kemach hot: hayt tsuu tach khan mer se fërtich khaafe im super market, un sin kans tayer.
Phaar sorte klees sin uns serwiert kep in Europa. Un tort kewe se net “Preguiça de Mulher” kenënt, wayl se aarich fiil aarwat kewe, un mit fayne sorte soos petiint kewe. Een sort hot “Lange Finger” keheest, un hate aach tee format. Anere taach hon se uns “Klees Kniple” uf ketixt. Weest yoo was kniple sin. Un waare mechtich kroose klees. Ich hon mich ferwunert un hon ëne klaych in te mite torich kexnit, wayl ich ketënkt hon ti weere kans klotsich: waare kans xeen fol lechelcher. Ich klaawe waar mit heep aan kemënkt, un aarich kuut kexmekt.
Ich sin tii kexichte am fertseele, wayl kastronomii is aach kultur. Macht uns an fayerliche taache tënke, wën ti familye sich samelt un aler kuutes aanricht. Is aach kultural ërepxaft. Soo wii tii woo ich aych am fertseele sin.
Tan, wil ich aych tsum xlus saan tas es “KRUMPEERE ore KARTOFLE RESEPTE PUCH” es eyerxte mool kans iwersets kep is in Hunsrik- Unser Taytx un aarich xeen kep is, tas es 110 sayte sin mit 94 resepte woo laych se
mache sin un meyer, fom Proyekt Hunsrik, uns noch mool fraye wayl mer mit te iwersetsung keholef hon tas noch en pisye fon unser kultur fer ti neekste xeneratsioone karanteyert kept.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com