Sii haten en fixeray kexeft un hate en aychene flote fon kleene xife, in partnerxaft mit Zebedeu un sayn puuwe Tiaako un Yohan.
Pheeter is aankesiin als te eyerxte pixof fon Room un, tesweche, sayne eyerxte phaapst. Es waar pis hayt te lëngste pontifikaat fon te kexichte: etwa 37 yoore, un is kextorep filaycht im yoer 67dC.
Te Kayser Konstantin, im yoerkang 330 dC umkefeyer, hot ti ortnung kep fer te pau fon te Alt St. Pheeter Basilika, woo pis es yoerkang 1450 kehal hot.
Im yoerkang 1506 hot te pau fon te aktual Basilika aankefang, un hot 120 yoore ketauert pis se fërtich kep is un is hayt tsu taach, eens fon te plëts woo te meyerxt pesuucht kep uf te welt. Ti kroos Pheeters Platz khan tausente mënxe konsentreere.
Kraat unich em altaar fon te Basilika, is Hayliche Pheeter sayn kraap, woo aach fiil pesuucht kept in te tuunels fon te Katakumbas. Tas playpt ploos 300meeter wayt fom plats woo eyer pekraytst kep waar. Tee saat tas eyer net khënt kraat soo xtërwe wii sayne Hër. Tesweche, is er pekraytst kep mit em khop noo runer, wayl er selepst tas soo ferlangt hot.
Te kroose eere woo Skt. Pheeter fertiint uf te kans welt is te Patroon fom Rio Grande do Sul ach weyert. Unser xtaat is mit tëm sayne naame ketaaft kep im yoerkang 1531 als Província do Rio Grande de São Pedro. In 1732 is ti xtat Rio Grande kekrint kep an te Lagoa dos Patos un waar ti eyerxt kapital fom xtaat.Ti khërich São Pedro is too uf kepaut kep, un is pis hayt noch ti haupst kemaynte.
Xeene kruus aus Thee Walt – Santa Maria do Herval, RS.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com