In en tsayt woo te aanruuf fer ti rechte fom kanse prasiliaanixe folek sich ferkreesert, hot en kroos petaytung tas yeete kleen xayp fon sayn kexichte xtuteyert kept, ketanknise noo hoole, tii woo soo oft fernicht kewe sole un wëre ach, in en natsioon woo ploos sayn khiner rechent tii woo sayn wortsle ferkes hon, un apxtoost tii woo noch te pewust iwer tas hot un suucht spesifixe paytraache se kewe.
In sayn kephek, hon ti inwanerer weenich keprung. In tëm sin is important te relijioose kephek foer heepe. In te khixt fine meyer tswaay, manich mool tray picher: tas puch fon te hymnos, te katekismus un ti Piipel. Aus tëne picher hon ti inwanerer wayter hiin sayn relichioon kefleecht. Mer wees tas relijioose leewe kept uersach fer kemaynte leewe un sokaar tas es iwerleewe meechlich kemach kep waar, neekst natierlich, un soo, reorkaniseere ti inwanderer sayn relijiooses leewe in Brasil.
Interesant waar es toch tas ti eyerxte kemeenxafts kepaue woo uf kepaut kep sin, tas net ti kapel waar, awer ti xuule, woo froyntliche penutst kep sin am woche ën, fer ti aantacht ore mes.
Fon te xuul kepau un khëriche xpreche, erinert uns an ti petaytung uner xermaanixe inwanerer iwer ti importans fom te ferayne: sayn kesangs ferayne, leese, xiise, keechel, jymnastik ferayne. Sayn hilef orkanisatsioone : Hilef-Khase, Kesuntheet, Xutz un fiile anere.
Oft waare ti inwanerer ti pauer fon te xtroose un woo se aach konserweyert hon.
Fon tëne sayn kans aarwat khome unser hunerte xermaanixe xtet, uf kepaut mim xwees fon te kemeesam aarwat, was uns tii aantwort kept:
YOO, MEYER SIN TI ANTWORT FER TËNE FOERFAARER SAYN HOFNUNGE.
Xeene kruus asu Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com