Un, klaapt mich, te haupt phunkt fom fest waar “BRASIL”, wayl meyer fom Proyekt Hunsrik un ti Emater fon Santa Maria do Herval ti Prefektuer fon Woelfling un ti Komisioon fom Krumpeere Fest pesuucht hon tas yoer, am 1º april.
Eyerxt, hon se kaar net keklaapt tas en Komisioon fom Brasil iine am pesuuche weyer. Meyer hon ti fersamlung ti kans woch fersuucht. Tan hon se fer te 1º april tsuu kesaat.
Meyer waare xon in te fersamlung xtup kewees mit te Komisioon fom Kartofel Fest un, noo un noo, sin imer noch anere importante persoone fon te xtat aan khom un al hon te hals an te tier rin kextrekt un saate iwer em rin khome:
-Sin wërklich layt too fom Brasil? -Wii se mich aan keruuf hon fer ti fersamlung, tacht ich es weyer 1º april!!!
Tii hon sich hooch erxtaunt mit te naychkheete woo meyer tëne fertseelt hon iwich unser Kartofel Fest. Meyer hon aach unser Kartofle Resepte Picher mit kenom fer tëne se xënke un aach “folders” fom Fest un fom Munisip. Tepay noch anere kexichte fon te inwanerer, usw.
Tii hon uns aach iweraxt mit en kuute moynts khafi un fiile kexënke!!!
Xlus? Hon uns ferxproch neekstes yoer uf unser fest khome un tas yoer hon se uns keweelt als theema fon tëne sayn Krumpeere Fest.
Tii hon aach penutst wayl Sarreguemines in mërts, uf em Festiwaal “MIR REDDE PLATT” te Brasil als Theema hate un noch weche te Olimpíadas hier im Brasil, yets in akust.
Te Proyekt Hunsrik fiilt sich kliklich en pisye too traan kretit hon un aach tas mer too mit hale khonte un pisye influëns hon tas tas paseyert waar! Ti letxt woch hon se uns ti pilter kexikt fon tëne sayn fest, woo se ales orkaniseyert hon unich unser prasiliaanixe faane un anere simpoole woo Brasil erinere.
Tan, khëne meyer aych saan tas Brasil un meyer, taytxe nookhomer im Brasil, im maul fon te europeyer tas yoer kans oft kewees waare.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com