Im yoerkang 1818 hot te eyerxte krupe fon taytxe inwanerer woo im Brasil aan khom is, sich niter kelos im siit fom xtaat Bahia. Awer, es waar im wayteste xtaat, im siit fom Lant, Rio Grande do Sul, in São Leopoldo – hayt metropolitaan rechioon Porto Alegre,woo ti eyerxt taytx kholonii kekrint kep waar in 1824. Tii sin noo em Brasil khom wayl se en peser leewe fer sich un sayn khiner ketënkt hate,wayl tas net mee meechlich waar in Taytxlant.
Rio Grande do Sul waar te xtaat woo te meyerxt taytxe inwanerer uf kenom hot. Hayt tsu taach, sin umkefeyer 25% fon unser pewooner nookhomer fon xermaanixe foleke.
Klaych hine noo khomt S.Katarina. Im yoer 1829 hon se aan kefang te xtaat Santa Katarina se pewoone, hayt te xtaat woo te meyerxt taytxe inwooner hot. Ti xtatistik saat tas 35% fom folek fon tëm xtaat taytx apxtamung hat. Tii selepst nëne sich “Te taytxste xtaat fom Brasil”.
Tan khomt Parana an ti ray.Klaapt mer tas neekst 10% fon tëne sayn inwooner nookhomer sin fon te taytxe inwanerer, ekstra te west, woo ti layt fon too hier un fon Santa Katarina noo ruf kewanert sin.
In klaynere numer, kept ti taytx presëns pemërekt in xtaate wii São Paulo, Espírito Santo, Minas Gerais, Rio de Janeiro, ti tswaay Mato Grosso un Rondônia.
Fer uns hier, ti alte kholonie, waar ti inwanerung fon 1824 pis ticht am yoer hunert 1900 kans important, weche te krintung fon fiile fon unsere xtet.
Awer, te hooch phunkt in numere fon te taytx inwanerung im Brasil fint tswixe 1920 un 1930, also noo tëm 1ªWeltkrieg un foer em aanfang fom 2ªWeltkriegs , en tsayt woo etwa 75.000 taytxe inwanerer aan khom sin.
Tii naye inwanerer sin net mee uf em lant xafe kang , awer waare faprik aarwaater, leerer, hand werk, usw. Soo, hat tas en kroos petaytung fer ti intustrialiseerung fom siit west un siit Brasil.
Im kansem, kewe umkefeyer 300.000 inwanerer fon xermaanixe foleke noo Brasil ketseelt, was hayt neekst 10.000.000 mënxe fon nookhomer sin.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
+