Meyer waare siwe kexwister, ich sin ti elst… Ich tënke traan, mit ferlange, an unsere leese xtun, nachts noo em ese,wën meyer siwe al uns mit em papa ins pet kexaft hon, yeete ëne mit sayn pichelche un hon uns an te payo kekhutchelt. Yete ëne must te khop uf te papa leye,pis an ti fiis, soolang wii eyer sayn tsayung ore khalëner keleest hot.
Ich sin kaar net sicher wii ich aan kefang hon se leese, awer tënke noch traan tas ich, mit seks yoer xon fliisent in taytx un in portukeesix leese khont. Sokaar in kotix xrift. Te papa hot mich ti “aarwat” kep te khalëner un te “Correio Riograndense” woo eyer unertsaychet hot tëm foer leese. Ti kexicht fon “Ti Muckers”, woo Fidélis Dalcin Barbosa kexrip hot, is too puplitseyert kep in kapitle yeete woch,wii en nowëla.
Mayne papa waar em xnayter, wii tëm sayne fater aach. Te xank tix ore palkon woo eyer sayn aantsych kexnit un keheft hot waar aarich hooch un ich hon khaum triwer kesiin mit te aue. Tan must ich ti eyerxte yoore uf en xtuul xteen fer se leese.
Erinere mich aach tas mayn mama oft fertseelt hot tas mayne papa sayn wowo, Frau Gerhard, en xtrëng leese kewoonheet inkesetst hat mit sayn khiner, woo tepay mayne wowo Frederico Hamester. Tas selwiche hot te Hamester Fritz kemach mit sayn khiner, un mayne papa aach, an sayn tsayt.
Hayt tsu taach, als autoorin fon phaar picher un leerin fer Letras un Literatur, hon ich aarich fiil se tanke fer tii kewoonheet fon mayn foerkhomer, was in mayn meenung, fiil keholef hot in mayn profisional leewe.
Kans klaar erkhëne ich unich mayn xiiler, ti woo tsum leese un fer te xtuutium unerstitst kewe fon sayn eltre.
Mit tëm thekst woo ich hayt aych pringe, wil ich fer mayne fater un mayne wowo en homenaaj am Faters Taach mache un tii eere, was mayne Liipe un Tankpaarkheet tsaycht, soo wii fer yeete fon aych, liipe heerer, tii woo Fater un Kroos Fater sin.
Ich meecht en foerxlaach pringe fer ti woo tas noch net mache, tas se en leese routine mit sayn khiner un ënkels khiner aanfange sole. Ich hon ti apsolut sicherheet tas ti khiner en taach, im futur, kans tankpaar fer aych sin wëre.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com