Ale tswaay waare Akatemiker, Linkwiste, poëte un picher xraywer.
Jacob Ludwig Karl Grimm un Wilhelm Karl Grimm waare in Hanau kepoer, im Kroos Hertsooktum Hesse-Taytxlant, in te yoore 1785 un 1786 un sin in Berlin kextorep, in te yoore 1859 un 1863.
Ti hon xtutiert in te Uniwersiteet Marburg. Fërtich, sin se in ti xtat Kassel woone kang, woo se als pipliothekars kexaft hon. Tii tswaay xtet sin ich, tas yoer in april, ekstra tesweche pesuuche kefaar: sin kroose xtet, mit mechtiche kepaus – wunerliche xlose, palaste, khëriche un museums.
Am ën fon 1812 hon ti Priiter 86 khortse kexichte puplitseyert, aus te muntlich tratitsioon, in te taytx rechioon Hesse kesamelt, in en puch mit tëm thitel “Khiner un Haus Kexichtcher”. Im yoer 1815 hon se sayne tswete wolume, mit mee wii siptsich kexichte puplitseyert.
Als resultaat fon tee forxung, hon ti Priiter Grimm en filolokix wërter puch ore tiksionar fon te taytx xprooch puplitseyert.
Unich te eksklusiif aarwat fon Wilhelm, kewe in te neekste puplikatsioone mee wii 200 khortse kexichte ketseelt . Too tepay sin: Root Hiitche, Ti Xeen Inkexloof Prinsesin, Sinterëla, Xnee Waysye, Rapunsël, Hans un Kreetche, Ti Musikante fon Bremen, usw.
In tëm Folkoor Moonat, wole meyer xpreche iwer tas puch “Mayn Liipste Kexichtcher”, mit 12 fon tëne famoose kexichte fom taytxe folkloor, iwersetst fer ti Hunsrik Xprooch pay 12 leerine fon Santa Maria do Herval, orkaniseyert un korijiert torich em Proyekt Hunsrik, mit ilustratsioone fon Cleiton Schneck Kasper, aach aus Santa Maria do Herval, puplitseyert im yoer 2016.
Te II wolume fon tëne foleks kexichte, iwersetst pay 12 leerine fon Estância Velha, woo aach orkaniseyert un korijiert am kewe is torich em Proyekt Hunsrik, kraat soo mit ilustratsioone fon Cleiton Schneck Kasper, woo xon palt fërtich kept fer in korts tsayt puplitseyert se kewe.
Soo, sin mer kans froo tas mer xtarek am helfe sin fer unser kultur un folkloor leewent hale fer unser neekste xeneratsioone.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com