Ti Kriste klauwe tas ti aarwat weyert kept fer te man, wayl tas iim erlaupnis kept fer mit helfe an Hërkot sayn kriatsioon aarwat wayter mache. En mensaaj fon Yohannes Paul II, kexrip im yoer 1981, nënt etwas importantes: “Ti aarwat is fer te mënx un net te mënx fer ti aarwat”
In tëm sin kewe ti wërter fom italieenixe pixof Pierfranco Pastore eep ti aarwat moynts aanfangt: “Kuut aarwat, awer net tsu fiil”. Tas wil saan, tas fiile mënxe sayne peruuf ausfiire khëne pisye automatix, oone uf es eyerxte plats te Liipe, ti hiinkepung un – was noch importanter is – ti mënxe. Ich heere kërn was Professor Felipe Aquino saat: “Wën meyer net unser aarwat fërtich kriin, is es wayl meyer tings am mache sin woo net tsu uns keheere:”
Too khomt ti neetichkheet fer ale kepot unser weyerte noo kuke, aan heere weyer ticht pay uns is un etwas aannëme tas mer uns ferpesere khëne. Am Aarwats Taach, mise meyer unser hofnung un unser rol renoweere, als hilfer fon te sosiaal entwiklung.
Im yoer 1955 hot te Papst Pius XII tas Fest fon St. Yoosef te Aarwater in kericht, fer en kristlich petaytung kewe un en xitser fer ti kanse aarwater kewe. Tas te 1ºMaay Fayertaach net ploos noch en taach is uf em khalëner, awer en taach fer an St. Yoosef – te Aarwater tënke “te xrayner woo in Nasaree, sayn ferflichtunge ketaylt hot mit Yeesus, aach.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com