Tee austruk is fon too aan foran penutst kep fer iwer ti tratitsioone, kewoonheete un awerklaawe fon ale foleke se xpreche. Xpeeter hiin, hot tas wort ti kanse kultur austruke fon te foleke umkefast un naame kep, was fer te Folkloor en status kep hot fon “kexichte woo noch net kexrip kep waare” fon en folek.
Wën ach te foerxrit fon te wisenxaft un teknolojii fiile fon tëne foleks tratitsioone te kretit wech kehool hot, hot te influs fon te positiife ketanke fom XIX yoerhunrt tii an en kroose weyert keprung, als link in en unkeprochne khet fon khëntnis woo ferxtan kewe must, tas mer ti motërn keselxaft ferxteen khënt.
Soo, wën mer wees tas ti populaar kultur ferxwine khënt weche te naye kewoonheete in te xtet, hot te xtuutium iwer tee phunkt sich wayt ferprayt in te selwich tsayt woo se aankefang hon te folkloor se penutse als haupt elemënt in khinstlerixe aarwate un festlichkheete, un too temit ti natsionalistixe sentimënte fon te mënxe un foleke uf wache.
Un torich tëm xtuutium hot ti populaar kultur mee importans kriit in te kans welt wayl weche tëm meechlich is ti folkloorix kultur un ti khëntnise fon yeete folek fon xeneratsioon tsu xeneratsioon wayter liwre.
Te folkloor xtuteere hot in Europa aankefang un fruchte kep, un tëm noo is tas noo Nort Amëërika un Brasil khom. Ti forschunge sin klaych fon Uniwersiteete unerxtitst kep, un sin erkhënt kep in paralel mit Antropologii.
Hayt tsu taach is te Folkloor in te aktual keselxaft fext inkextelt un is als wisenxaft erkhënt, soo tas ti foleks kultur ore folkloor, lërn instrumënt is in xuule un is kexitst fon te UNESCO un fon fiile natsioone, woo aach fiil fon sayn elemënte in histoorixe, khunstlerixe un kultural ërepxaft inkesetst hon.
Im Brasil, kept te akust moonat fon meerer fayeerlichkhete im kanse Lant markiert. In xuule un kultur sentre kewe ferxiitne aktiviteete torich kefiert, un te haupt motiif is ti kultural raychtum fon unser folkloor wayter liwre.
Te Proyekt Hunsrik fiilt sich kans xtols in helfe tas te folkloor un ti kultural raychtum fon unser folek wayter kelërnt kept fer unser khiner un milioone nookhomer torich unser xeen tausent yeerich xprooch.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com