Was mëyer fer ti ausxtelung keprauche khëne sin fiil fotos: Tii fotos tuun se tan austruke in Banners, in kroose format: Pilter fon te hayser, ti lantxaate, fon te layt, fon te fëster – wii tas Kartofel/Krumpeere Fëst, Pier Fëst, Ëyertpeere Fëst, usw, ti firme, sokaar ti friithoofe mit te familye naame. Also, tëm puplikum wole mer tsayche wii ti layt im Brasil leewe.
Es këpt naame xilte, xtroose xilte woo fom hunsrik apxtame, Ortsnaame mit hunsriker aksënt, wii Frankentaal , Birkentaal, Yamertaal, Walachei, Neu Reinland, Neu Frankraych, Comercial Schneider, Empresa Wendling, Ovos Filippsen, usw. Tas ales wole se khëne lërne.
Mit uns, faart aach Deise Wickert, extensionista fon te EMATER, woo mit pauers fraae krupe xaft,woo aach proyëkte mache fer unser kewoonheete un xprooch pehale, in resëpte, kepeete, kesang, usw. Sii tuut aach ti puch mëse tort mit hale, wayl se hëleft yeetes yoer naye kartofle resëpte samle fer tas Kartofle/krumpeere resëpte puch fom Kartofel Fëst woo triwe auskextëlt këpt. An eene fon tëne krupe halt ti Lúcia Schmitz Braun mit, woo aach inkelaat këp is un mit faart.
Mayn mama hot imer fertseelt wii sayn familye nachts kesung hat. Tas sëlwiche hot mich imer en nachpaarxfraa fertseelt, Ilse Kunsler. Un fiile fon tëm sayn kexwister un ferwante singe imer noch im koraal.
Soo, te haupste phunkt fom FESTIWAAL “MIR REDDE PLATT”, woo xon 18 yoer pasëyert, is unser kewoonheete un xprooch leewent hale un ti yuuchent sich intereseere mache fer sayn moter xprooch wayter xprëche ore xwëtse. Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equipehunsrik@gmail.com