Carlos Drummond de Andrade saat:
Fer en nay yoer se treeme woo tee naame weyert is, must tuu, mayne liipe, es fertiine, tuu must es nay mache.
Ich wees, es is net eenfach, awer fersuuch es, proop es, mit klaare ketanke…
In tich xlooft un waart tas Nay Yoer tsayt imer noch!!!
Un Albert Einstein hot aach kesaat:
“Es kept khee unmeechliche treeme fer tii woo wërklich klaawe tas ti kraft fer realiseere in yeete mënx trin woont.
Imer wan yemant tii macht entekt, kept etwas woo tefoer als unmechlich kerechent waar, in realiteet keprung.”
Ti fokete tuun aan saan tas en nay yoer am khome is!
Es is tsayt fer noch mool frix se pleene tayn treeme woo noch net realiseyert kep sin un klaawe tas tuu se konkretiseere khanst. Kep fer tayn froynte en simpatixe un liipliche aue plik un khanst kaapse fer tayn faynte ore, wii se hayt tsu taach saan, en khusye an te xuler.
Tsayt fer etwas lërne mit te feeler woo mer tas yoer kemach hon un mit en lechle fayre tas nay yoer woo am khome is. Laafe fer se trefe te liipe woo noch net ferloer is ore unsre alte liipe noch mool erfrixe.
Te Proyekt Hunsrik winxt fer aych al:
– Te Klaawe, tas Hërkot tich seechne tuut iwer ti kanse 365 taache fom Nay Yoer;
– Te Liipe, woo te kotliche soome is, keplanst kep in ti hërtse fon te mënxe mit kuute wile;
– Ti Frayt, woo ti Seel neere tuut un te Kayst xtërker macht;
– Ti Kliklichkheet woo tuu recht traan host;
– Tas ti Prosperiteet tayn froyntiin sin sol iwer tii rees!!!
Xeene kruus aus Thee Walt!
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com