Uf te preter hon kroose wërter aan kesaat tas weyer en nachts kluup ore boate. Mayn tochter hot uf mool xtop kemach, ti hant uf ti pruxt kehal, wii wën sii en loch am tsuu teke weyer un saat erxtaunt: – Ui, mãe, siit aus tas te taywel am kewine is!!!
Wayl ti kemayne khee mitkliiter mee hon un ti khëriche leyer xteen, wëre se ferkhaaft fer plats mache fer komersiaale proyekte hiin pringe. Ti xnel xwechung fon te kristliche klaawe in Europa hat fiile khëriche tsum xliisung kefiert. Plets fer Hërkot aan petung sin yets turn hale ore akatemiis, super markets, kexefte un sokaar bars ore nacht kluups transformeyert kep.
Ti situatsioon fon anere relichioone sin kans anerxter fom Kristentum. Ti ortotokse yutentum is relatiif staapil keplip. Uf te aner sayt wachst te islamismus torich ti inwanerer aus Afrika un Tichte Oriënt.
Te numer fon muslime hot umkefeyer 4% fon te europeyix total pefolkerung representeyert in 1990. In 2010 waare ti muslime 6% un sole 8% sin ore 58 milioone mënxe pis 2030 in Europa.
Wën ti khëriche net mee penutst kewe, kewe noye plets kepleent fer khunst, piltung un sport. Wii ti pau khoste oft tsuu hooch sin, kept ti alt khërich fon komersiaale proyekte iwernom ore ap keris, fer plats kewe fer motërne kepaus, wayl es normal kenau im sentrum fon te xtet playwe.
Te senaario in europeyixe natsioone is kans traurich, wayl ti khërich fon England macht 20 thëmple tsuu yeetes yoer. Umkefeyer 200 khëriche sin xon net mee se hale kerechent kep ore weenich penutst in Deenmark. In Taytxlant, sin xon 515 katoolixe khëriche tsuu kemach kep in te letste 10 yoer.
Holand is tas lant woo ti khëriche xliisunge konstanter is. In te neekste tseen yoore khëne mee wii 1.000 katholische khëriche kexlos kewe un 700 protestante khëriche tuun in fier yoore filaycht net mee eksistiire.
“Ti tsaale sin soo kroos, tas ti kans keselxaft too temit umkeen mus”, saat Lilian Grootswagers, en aktiwistiin fer te futur fon ti relichioosix ërepxaft, woo xafe tuut fer ti khëriche preserweere.
Relichioose forxer ore pesquisadores saan tas te tsurik kang fon te numere fon te amerikaanixe kriste foer tsaychent tas EUA, in te neekste yoore mit tëm selwiche propleem konfrontiert sin khëne. Un im Brasil, wii is ti situatsioon?
Halt aych munter!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com