Tee macht aach forxunge in Alto Feliz, Igrejinha, Santo Cristo un São João do Oeste.
Es eyerxte mool wii er khom waar, phaar yoer tsurik, waar er sayn Master Aarwat am mache. Eyer hot sich soo ferliipt an unsere proyekt tas klaych tëm noo eyer en sientifike artikel mit 28 sayte kexrip hot iwich unsere xeene un farwiche tiksionar fer khiner –“Mayn Eyerxte 100 Hunsrik Wërter”, un hot tee puplitseyert an te Linkwistik Uniwersiteet Barcelona, in Spaanye, woo teyer fon te Internet runer laate khënt unich em thitel “Hunsrik Xraywe = Mateusz Maselko.
En yoer tëm noo hot eyer noch en artikel mit 10 sayte puplitseyert in en Linkwistik Tsaytung in Rumeeniye mit em thitel “Hunsrik Lërne”.
Yets am 6, 7 un 8april, hot tee un sayne Professor Dr. Manfred en Linkwistik Seminaar orkaniseyert in te Uniwersiteet Wieena un am 07april-fraytach hot Mateusz noch mool en foerxtelung kemach fon en forxung woo eyer mit uns am letste teetsemper hier im RS torich kefiert hat iwich en phunkt fon te kramatik fon unser xprooch.
Un, fer te 08april-samstach waar ich selepst inkelaat fer se xpreche fer en thurme fon 33 xtutënte woo xon neekst fërtich sin mit sayn Master Aarwat.
Fon 10h moynts pis 12h30min. un fon 14h pis 17h hon ich iwich unser folek un tii woo noch unser xproch xpreche fertseelt un tii hon mich aus kefroot mit soo en kroose interese iwich ti xrift un anere phunke tas uns ferwunert hot. Am ën hon ich tëne sayn kluuchheet keloopt fer ti tswaay leerer un tii hon mich keantwort tas xtutënte fon fiile natsioone tepay waare. Eens, ekstra inkelaat, fon Luxemburgo, natsioon woo unser xprooch ti ofitsiaal xprooch is.
Un, was en kroose eere un interese fer uns hat, is tas fier fon tëne xtutënte, noo unser presentatsioon, aan kesaat hon tas se sayn finaal aarwat fom Master Khurs mache wole iwer unser folek un unser xprooch, weche was ti 2 leerer fon frayt ti hënt kepatch hon!!! Un meyer aach tepay!!!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com