Hofnung is net ti woo te letxt xtërept. Is ti eyerxt woo tsum foerxayn khomt wën ales ferloer un oone solutsioon aus siit…
Wayl, weyer hofnung hot wees tas en taach te xtorem rom keen mus un tas es prile uf heyert un kept plats fer es lache…
Wayl, weyer hofnung hot, tuut klaawe, un weyer klaawe hot, hot ales.
Hërkot kept fer te soome khorn ti sun un te reen, te kliima un te khamp, tas uf pase fom kholonist un te seechne fon te yoer tsayte, awer te soome khorn mus mit sayn aychne kraft khayme, sich pis ans sune licht hiin xtreke.
Ti hofnung un te traum sin tswaay peruichung remëëtios woo ti mënxe penutse khëne fer sayn leewe ferpesere. Tas meyer flite hon khëne fer se treeme, hofnung fer se klaawe un klaawe fer wayter xafe im neekstes yoer.
Noo aler xtorme, aler xtërtser, aler treene, mus mer imer klaawe tas etwas kuutes am khome is.
Wën te khamf tsuu xweyer is, tënk traan tas im leewe niks is fer imer, net mool ti khëmfe un net mool ti propleeme, ales keet rom. Un, was mee important is: Hërkot kept fer khee een fon sayn khiner en last iwer tëm sayn kapasiteet fer se traan.
Te xtorem hayt khan kans tunkel sin, awer es kept imer en xans tas mer moye moynt en xtraalent krel sun uf xtaye siin.
Sich en soniche moynt foer xtele noo en nacht woo mer net kuut kexloof hot is en hofnung, Tas is klaawe un optimismus. Iwer es Nay Yoer 2017, kep en xans fer ti hofnung.
Tas leewe kept uns ti meechlichkhet fer unser aychne kexicht yeete taach se xraywe, peaarwate un ferpesere. Say kluuch un xrayp en kuut kexicht: tayn aychnes!
Soo, xrayp en xeen kexicht fer tayn leewe un fer tayn familye, fol mit susës, kesuntheet, eenichkheet un kliklichkheet, un ekstra, mit fiil HOFNUNG!!!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com