HUNSRIK 1457
Haloo, hier is Solange Hamester Johann, fom Proyekt Hunsrik.
Ti Phaynlich Kexicht fon te Familye Kirchen
Mier al khëne xon ti enorme xwiirichkheete woo fiile inwanerer familye mit
kemach hon iwer sayn rees noo em Brasil un tan pis ans lant woo se kriin teere.
Soo, wole mer aych fertseele iwer ti traurich kexicht fon te familye fon Valentim
Kirchen, woo am 18mërts1829 mit en kroose krupe fon 870 inwanerer fom Xif Olbers
aan khom sin, woo sich haupstens in Dois Irmãos un São José do Hortêncio niter kelos
hon.
Valentim Kirchen is hier im Walachei-Dois Irmãos aan khom in te elter fon 40yoer
aus Idar-Oberstein-Birkenfeld, was hayt tsu Rheinland-Pfalz keheyert. Er waar en
ewankeelixe pauer, ferhayrat mit Maria Luísa Matte, 34yoer alt un hate 6 khiner.
1.Valentim Kirchen-12 yoer; 2.Karl Kirchen – 10 yoer;
3.Carolina Kirchen- 7 yoer; 4.Luíza Kirchen- 5 yoer
5.Catharina Elisabeth Kirchen- 3 yoer; 6.Un te nëne Christian Kirchen- 1yoer alt.
Ti kexicht fon tee familye mit acht persoone is krislich phaynlich. Ti sin noo en
frëmt lant khom fer en naye futur fer sayn familye se suuche, hate awer net te
“Klikliche Ën” woo al soo ansioos truf kewaart hon. Am 30maay, siptsich taache noo
sayne aan khom, is te nëne Christian kextorep mit etwa een yoer alt, un weenicher wii
tswaay woche xpeeter, am 12yuuni, is ti Carolina, fon siwe yoer kextorep.
Wën soo en xrekliche unklik net kenuuch weyer, xtërept am 14yuuni, tswaay taache
truf, te elste soon Valentim, mit 12yoer, un am neekste taach, am 15yuuni, xtërept
Karl, mit 10yoer.
Khan mer sich soo en riisich phayn fon te eltre foer xtele, wën se in tswaay woche
fier khiner ferloer hon? Khan en mënxlich hërts phake soo fiil layte se traan? Khëne
mer frooe op se in tepresioon kefal sin? Mit was fer muut wëre se sich uf en frëmt Lant
xtele, en nayes hëm uf paue? Meechte se sich peroyt ore arepenteyert hon tas se te alte
haymat tsurik kelos hon?
Mier khëne tas ales net fer aych antworte, awer was sicher is, is tas te fater soo en
xweyer tortur net aus hale khont un am 31yuuli1829, 45 taage noo em toot fon sayn
fier khiner, is er aach kextorep.
Soo, kans aleen, muste ti moter un ti tswaay kleene meetcher fon tray un finef yoer
in en unpekhant lant sich tsurecht fine:
-Luíza Kirchen, tas meetche woo 5yoer alt waar, hat kehayrat im elter fon 17yoer mit
Georg Alexander Nelsen, woo fon Dinamarca khom waar, hon in Porto Alegre
kewoont un hate 2 khiner.
-Catharina Elisabeth Kirchen, tas meetche fon 3yoer, wii es 19 yoer alt waar, hot
kehayrat mit Hubert Mombach, aus Walachei, un hate 5 khiner.
-Ti witfraa Maria Luísa Matte hot noch mool kehayrat mit Friedrich Leindecker, un
hat noch 5 khiner kehat. Is im elter fon 56yoer in Porto Alegre kextorep.
Xeene Kruus aus Thee Walt.
#hunsrik #culturaalema #imigraçãoalemã #brasilalemanha