Metiteere mit tankpaarkheet. Ploos 2 ore 3 minute moynts fer traan tënke fer weem ore was tuu tanke wilst. Tuu must ploos ti aue tsuu mache un kans ruich tënke iwer es tings un mënxe woos tuu tanke must wayl tii tayl in tayn leewe sin.
Saa tanke xeen. Wën yemant etwas kuutes fer tich mache tuut, aach wën tas etwas kleenes is. Un say wërklich tankpaar.
Kuk tas “nekatiife” anerxter aan in tayn leewe. Es kept imer tswaay meechlichkheete fer etwas aan kuke. Oft keen meyer torich etwas nekatiifes, xtrësich, kefeerlich, traurich ore xwiirich. Propleeme khëne als oportuniteete aan kekukt kewe, fer se wakse, kriatiif sin, fer se lërne, sich ferënere. Tas selwiche khan in en positiifer aart un mit wayse uf kenom kewe. Es is en kuut meechlichkheet fer sich traan erinere tas in neekst ales etwas kuutes is.
Sii kwaliteete in te mënxe. Fersuuch tich uf ti kwaliteete fon te mënxe konsentreere anxtat uf sayn feeler. Tas tiint als insentiif fer tee persoon. Tii ferënerung khan anere helfe sich ferpesere, was tëne wise lost tas tuu tëne weyert kepst soo wii se sin.
Mach en list fon te kuute tinger woo iwer em taach paseyert sin. Foer em pet, tënk an ales traan. Es tauert ploos en minut ore tswaay, kans weenich fer en friitlicher un kliklicher xloof hon.
Yeete taach ti tankpaarkheet iipe is eene fon te weeche
woo torich ale raychtume pis an tich khome khëne!!!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com