Un ich hon klaych ketënkt: Yoo, hayt tsuu taach mus mer fiil koraaj hon fer unser aktiwiteete yeete taach foer hoole un unser leewe “normal” wayter xafe:
– fiile layt hon sayn aarwat ferloer un khëmfe fer sayn familye wayter hale;
– ich sin inkelaat kep fer en seremonii in te haupt xtat un hon khee koraaj fer hiin keen wayl tas sol nachts paseere;
– ale kepot kewe layt samer keruuf fer proteste mache ore tumult aan saan, tan wees mer net op mer khan fon tehëm aus keen;
Woo sole mer koraaj fine¿
Fon te françoose xprooch khomt tas wort koraaj fon “cor-age” – mit em hërts mache – agir com o coração.
Te mënx oone pang tuut sich motiweere wayter se keen. Mer khan pang hon, awer in te xlime momënte mus mer sich foran xafe, is ti positiif kraft woo uns noo foran xupt, woo mer in unser familye fint, mit te froynte un in unser aychne hërts.
Soo, in unser aktuaal situatsioon, mise mer uns fol koraaj mache un helfe, iweraal woo mer helfe khan, tas ales sich normaliseyert un tas es leewe wayter laafe khan fer unser khiner un nookhomer.
Meyer, woo kuute wile hon un tënke teere richtich xafe, mise samer hale tas es leewe sich net in ferkheyerte weeche rin lënkt,
tas niks xlechtes paseere tuut mit unsere familye un mit unsere kemaynte.
Koraaj is tas wort fer ale situatsioone. Als wayter.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com