Kroos waar te Prinses sayn influëns iwer te protses fon unser intepentëns fon Portugal.
Khee tsayt fer waate tas Pheeter tsurik kheemt fon São Paulo, mit em hilef fon José Bonifacio, hot Leopoldina – als Rejënt-Prinsesin, en fersamlung fom Xtaat Minister Konseel aan keruuf un sii selepst unertsaychent te Tekrët fon te Intepentëns, woo uns apketrënt hot fon Portugal am moynt fom 2. septëmper 1822.
Ti Kayseriin xikt en priif fer Pheeter, tepay mit een aner fon José Bonifácio. Sii ferlangt tas Pheeter ti intepentëns fom Brasil aan saan sol un, in tëm priif xraypt se: “Ti frucht is rayf , ërnt se yets, sonst tuut se faule”.
Pis Pheeter tsurik fon São Paulo khom is, hot Leopoldina, woo yets ti fray natsioon Brasil am rechiire waar, ti prasiliaanix Faan kepleent, woo ti kriin farep fon te Bragança Familye un kolt kelep farep fon te Familye Habsburg-Lothringen fermixe tuut, mit em hilef fon sayne froynt, te fransoose mooler Jean Baptiste Debret.Tii selwich kriin un kelep faan fom Kayseraych Brasil is imer noch hayt ti basis fon unser aktuaal faan.
Noch im yooerkang 1822, hot Pheeter I selepst de Natsionaal Himno komponiert, was hayt te Himno fon te Intepentëns is.
Ti Kayseriin Leopoldina Habsburgo-Lothringen waar ëngel khint fom Hertsook fon Lothringen Frans Yoosef, letxte kayser fom Reemixe-Xermaanixe Kayser Raych – tee woo unsere taytx kexproch hot.
Sii waar unser 1ª fraa in te politik, filaycht ti importantest pis hayt un hot unser rexpekt fertiint.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com