Hayt, wii ich unsere prokram prepareere must, must ich aach mayn Hunsrik xuul pleene. Un too, falt mich in ti hënt en puuch woo als thitel hat:”Mënxliche Weyerte”.
Oft wërt too triwer kexproch, un phaar mool hon meyer xon too triwer mit aych fertseelt. Tan, khome phaar wërter fon tëne foer, woo mer khënt als hauptsache im mënxliche leewe: eerlichkheet ore honestidade un justis.
-Eerlichkheet: – mit unser familye;
– mit unser aarwat un kholeeke;
– in unser kexëfter;
– in te politik…
Soo oft wërt mer keproopt fer te richtiche weech aus suuche un soo oft siit mer yemant te ferkheyerte weech aus suuche.
Un ti justis?
Milioone persoone waate justis yeete taach, un moye anere milioone es selwiche, uf te kans welt.
In te letste 50 yoer, is ti mënxheet mee foran kang wii in te kans eksistëns fom man uf te Eyert tefoer.
Un, filaycht, kraat tesweche, siit mer imer mee neetichkheete fon te mënxe.
En tritel fon te mënxe uf te welt tuut imer noch hunger layte. Ploos tas tsaycht uns wii fiil noch se mache is.
Unser welt is soo wiiterxprichlich ore contraditório tas, wën mer kukt woo mer xon hiin khom sin, kept mer froo: soo fiil kuutes wërt kemach… un wën mer kukt was noch feelt se mache… siit mer tas noch khilomeeter se keen sin… sokaar in eerlichkheet un justis.
– Wii eerlich sin ich?
– Wii kerecht ore justo sin ich?
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com