En xokolaate aay als en Oster Simpool tuut sich xpasich aan heere, awer tas khomt fon en kans alt kewoonheet fon unser friirixe foleke. Tas aay is en simpool woo xon penutst kep waar foer 5.000 yoer un representeyert ti fruchtpaarkheet un frix leewe, ekstra wën ti Friiling tsayt khomt.
Ti foleke um Metiteraneo Meer rom-wii sokaar ti kriiche un ejypte, ti foleke in Oost Europa un im Oriënt hon fer sayn froynte un ferwante aayer kep fer ti hërlich Friiling Tsayt fayre. Fer en kuut ërnt fertiine, hon ti paure aayer uner kekraapt ins tsaker xtik iwer ti plans tsayt.
Xon in tëne ferkangne tsayte waare ti aayer iwer kuut tekoriert un pemaalt. Un xon in te Mitel Elter hon ti noople fer sayn froynte un importante layt aayer kexënkt, ferputst mit eetel xteen, fon potselaan kemach, fon metal ore hols. Te Kheenich Eduard I, fon England, hot aayer kexënkt woo in kolt kethunkt kep waare. Fon tëne kewoonheete is te khunstler Fabergé famoos kep, was ti tayre “Aayer Fabergé”, fon potselaan un xteen un kolt kemach, hayt pekhant sin.
Ti xokolaate aayer sin xpeeter hiin in moote khom, kenauer kesaat, im 18. yoerhunert, fon te fransoose kexaft, wayl te kakau is yoo fon hier, fon Amëërika riwer kenom kep.
Unser taytxe foerkhomer hon hinkels aayer in farwiche thinte kekhocht un sich aarich kefrayt an te Oostre ore am Tswete Oostre Taach. Wust tuu tas in Europa pis hayt noch te Tswete Ostre Taach fayertaach kept¿
Ti khiner waare mit fiil weenicher tsufriite wii hayt tsu taach. Ti mamas un wowos hon khuuche un hoonich tos kepakt. Ore hot mer ploos en phekcher fon te farwiche tos kriit un mer waar kans froo temit kep.
Awer, was important is, is tas meyer etwas wayter lërne khëne fer unser khiner un ënkels khiner. Kukt mool wii xeen, tas meyer imer noch hinkels aayer fërwe, en kewoonheet fon 5.000 yoer tsurik. Was sicher is, meyer tërfe net uf kewe.
Aus Thee Walt, winxe ich
Freeliche Oostre fer Aych al, liiwe Heerer.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com