Ti unklauplich majii fom aay, woo uf precht un en nay leewe pringt, këpt xon peoopacht pay al ti friirixe foleke. Ti hon ti natuer un sayn elemënte uf kepast, ekstra ti sun, woo tëne sayn kwel fom leewe un enerjii waar, fer sayn plataaje, sayn fii un fer sayn aychne kesuntheet.
Ti friiling tsayt, noo em xnee un khalte winter, hat ti kuut hays sun keprung, woo fer ales frix leewe kep hot.
Tan hon se tas friiling fest aan kericht, mit te kefërepte aayer, woo tas naye leewe petaytung tsayche.
Yeesus sayne haupste kepoote is: “Liipt ëne em anere soo wii ich aych keliipt hon”. Un mit sayne toot am krayts hot Eyer uns en nay leewe meechlich kemach.
Noo Yeesus, kept tas altes un tratitsionaal friiling fest in unser Oostre Fest kewantelt.
Tas folek hot tas aan kenom, awer hon ti aayer wayter kefërept un, noo Yeesus, kewe se nime uner kekraapt fer ti natuer, awer kewe kexënkt fer unser peliipte, unser khiner, ferwante un froynte, fer tas naye leewe in Yeesus wile yeetes yoer fayre.
Ich fine tas ti xeenst temonstratsioon fon te Oostre tsayt: ti tsaatlichkheet fon tëne xeene aayer, woo mit fayne kefiil kefërept këwe un tan kexënkt fer wëyer mer liipe.
Tan, suuche ich mayn liipste froynte aus un mayn familye fer ekstra xeene kefërepte aayer aus teele. Un fer aych, mayn liipste heerer, winxe ich fiile xeene kefërepte aayer un noch fiile liipe in Yeesus.
FREELICHE OOSTRE!!!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com