Am 30 oktoower 2012 is en komitiif fon te SBB noo em Thee Walt khom fer unser khiner se filmeere tas puch fliisent runer leese, wayl ich hat ti kexichtcher xon peaarwat kehat in te xuule. In tee keleechenheet hon 300 khiner tas puch kexënkt kriit.
Klaych tëm noo, in noofëmper 2012 is tan tas puch “PIIPLIXE AWENTUURE”, mit aariche xeene ilustratsioone aus kep waar uf te Feira do Livro fon Porto Alegre, mit foerxtelung in te “Sala Leste fom Santander Cultural” un aach mit representante fon te SBB tepay.
Was uns xtols macht, is tas te susës mit unser khiner, woo tas puch aarich kërn pehantle, hot tëne – fon te SBB, ti itee kep fer en kreesere proyekt = Xprooche fom Brasil – Línguas do Brasil. Un soo, is tas puch hayt tsu taach xon puplitseyert kep uf pomeraanix, uf te sikayner sayn xprooch, uf libras un noch uf phaar intiaaner xprooche.
Foriches yoer, uf te Puch Mese fon Presidente Lucena hon mer aach tort 300 picher aus ketaylt fer ti xuuler khiner, kraat soo wii uf neekst 30 anere puch mese in te rechioon tsayt 2012.
Yets, am letste 24 oktoower hate meyer – Proyekt Hunsrik un SBB-Porto Alegre en important trefung in Sapiranga-RS = en kroos fersamlung mit umkefeyer 30 persoone, mit te Prefektiin Corinha Molling, ti kanse sekreteyer fom munisip un phaater un farer fon yeete khërich un relichioose konkrekatsioone fon te xtat, woo unser foextelung iwich te Proyekt Hunsrik un unser moter xprooch aan heere khom sin.
Too, hon meyer 400 fon tëne xeene un farwiche picher ap kep fer ti Prefektiin un ti Secretária de Educação, woo se aus tayle tuun fer yeete xuul.
Klaych tëm noo hon meyer, al mitsamer, em mechtiche kuute moynts khafi ketrunk, woo ti Prefektuer fon Sapiranga aan kepot hat fer uns al, in en aarich xeen unerhalung un ferkniichung.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com