Te Chico Mendes Institut fer ti Piotiwersiteet Preserweerung, saat tas Brasil mee wii 120.000 sorte tiire un 40.000 sorte planse hot. Tii warieteet fon Pioome xpiichelt ti kroos raychtum fon te Flora un Fauna fon unser lant: Te Ministerium fer Umwelt fersichert tas Brasil te haymat is fon te kreest piotiwersiteet fon te welt.
Tii raych tiwersiteet fon leewe – woo mee wii 20% fom te kanse sorte fii un planse uf te Eyert umfast – macht fom Brasil ti haupst natsioon unich te 17 Lënter mit te heechst Piotiwersiteet fom Planet.
Khan mer net too triwer xpreeche oone ti piine nëne. Ti Piolookix Tiwersiteet, soo wii meyer se khëne, hëngt an tëne insëkte un sayn unmiitlich aarwat in poliniseere, woo ti protuktsioon fon fruchte un soome un reprotuktsioon fon fiile planse karanteyert, un is, tesweche, en importante mitel fer ti forterung un erhalung fon te piotiwersiteet uf em planet.
Tëm noo te ONU, ti piine mache 73% fon te poliniseerung/pextaupung fon te planse woo kultiweyert kewe un tirekt ore intirekt penutst kewe als leepens mitel.
Te General Sekreteer fon te ONU, Ban Ki-Moon, xtelt fest tas ti intekratsion mit ti piolookix tiwersiteet en funtamentaal petaytung hot, fer te fortxrit un ti aart wii ti kemaynte tëm weyert kewe un penutse.
En klopal aanxtrëngung fer sich atapteere an te kliima ferënerung is aarich nootwenich.
Ti piolookix tiwersiteet konserweere is en important teel fon unser flicht eene mit em anere un ekstra mit te Eyert, tii woo uns neere tuut.
Meyer mise ale layt aan ruufe fer ti piolookix tiwersiteet preserweere un fer ti richtich penutsung fon te warieteet fom leewe uf te Eyert, tas ti aktuaale un ti neekste jeneratsioone tas aach noch penutse khëne.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com