Awer, tas yoer, hat ich en woch iwerich tswixe tswaay seminaare, un tan is kepleent kep meyer teere Portugal pesuuche, wayl unser lant Brasil soo fiil se tuun hot temit.
Histoorixe kexichte hon mich tsayt khint uf intereseyert. Tan, hon ich mool ti portukeesixe xtet xtuteyert woo se tuun hon mit unsere kexichte un mit unser Royal un Kayserlich Familye.
Soo, hon mer Lisboa pesuucht, woo in taytx Lissabon heest. Aler eyerxt hon mer ti “Torre de Belém” pesuucht, uf te rechts sayt fom “Rio Tejo”, plats fon woo ti 13 xife ap kefaar sin wii Pedro Álvares Cabral noo em Brasil khome solt. Fon tëne, sin ploos tray hier aan khom weche en kroose xtorem iwer meer. Ti thorem is in 1515 kepaut kep, fer ti haupt xtat fon Portugal se xitse. Is 4 xtok hooch, un ti UNESCO hot se aan kep als Welt Kultur Ërepxaft, weche sayn arkitektuur petaytung un importans fer ti “Meer Entekung Tsayte”.
Pisye wayter, playpt te riisiche Tënkmaal ore Monumënt fer ti Entekunge, 56m hooch, 46m lang, 20m prayt woo en xif petayte sol, mit 32 riisiche xtatue uf te tswaay sayte, fon importante mëner fer ti entekung fon fiile plets uf te welt.
Wën mer fon uwe runer kukt, uf em potem, en mechtich kroos “Wint Roos” un in te mite ti welt khaart ore “Mapa Mundi”, kans in kranit aus kexnitselt.
Fon too sin mer wayter kefaar fer te Palas Queluz pesuuche, woo D.Pedro I kepoer kep waar. Was mich soo aarich emotsioneyert hot waar en kroos tsimer, woo tee uf ti welt khom waar un, im selwiche pet is eyer kextorep, mit 34 yoer alt. Un unser Kayser D.Pedro II sayn kexichte sin aach in en kroose un mechtich fayne saal aus kextelt.
D. Pedro I sayn elst tochter, Maria da Glória, waar Khenichiin in Portugal tsayt 1834 -wii sayne papa kextorep is, pis 1853, wii sii kextorep is, aach mit 34 yoer.
Tas petayt tas unser Kayser D.Pedro II sayn xwester in Portugal kheenichiin waar in te selwich tsayt woo eyer hier Kayser waar.
Tëm noo sin mer noo te xtat Mafra kefaar, woo te ausnaams Palas Mafra in 1717 kepaut kep waar, eenlich wii te Palas fon Wien, wayl D.João V, fater fon D.João VI un kroos fater fon D.Pedro I mit en Prinsesin fon tort kehayrat hot. Tee xteet uf 4ha. lant. Mus mer aach phaar xtun hon fer ales se kuke. Awer tas ales is soo mechtich te weyert se pesuuche.
Xeene kruus aus Thee Walt.