Im yoer 1908 marxeere mee wii 14.000 fraae uf te xtroose fon New York, mit em slogan “Proot un Roose”, woo tas Proot ekonoomik stapiliteet sympoliseyert un ti Roose en peser leewens kwaliteet.
Ferxiitne Mowimënte hon sich fereenict – fer ti ikaliteet fon te ekonoomike, sosiaale un aarwats rechte, un ti recht fer se weele un fiile anere. Ti ONU hot es yoer 1975 tas Internatsionaal Yoer fon te Fraae aan kesaat. In 1977 hot ti ONU te Internatsionaale Fraae Taach inkextelt fer uns erinere an ti sosiaale, politixe un ekonoomike realisatsioone fon te Fraae tsayt ti letxte yoore fom XIX Yoerhunert un aanfang fom XX Yoerhunert.
Wii tee taach in kextelt kep waar, waar tas net ploos fer se fayre. In te mayste natsioone kewe konferënse kehal, tepate un fersamlunge, mit em opjektiif fer tiskutiire was fer rol xpiilt ti fraa in te aktuaal keselxaft. Ti aanxtrëngung is fer fersuuche ferkleenere, un filaycht en taach xlus mache, mit foer kenomne konsepte.
Ti kompetëns hot ti fraa hiin kenom woo se sayn plats konkisteyert hot, rexpekt fertiine tuut un recht fer mee se treeme. Hayt, is ti fraa in ales tepay, un tii presëns multiplitsiert sich in yeete traum woo se aan khom is.
PROOT UN ROOSE! Unser Homenaaj, torich ti Roose un unser erkhënung un tankpaarkheet fer ale fraae fon te Welt … unser kroos moter , unser mama, leerin, tokterin, atwokaat, richter, pus xfeyer, froynte, tochter, xetsyer, unser fraae…
Tii woo ti Moter fon te Kriatsioon sin, ti Orikiin fon te Evolution!!! Tas es Proot tëne nii feele sol, im wayteste sin fon tëm Wort!!!
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com cx