HUNSRIK 997
Haloo, hier is Solange Hamester Johann, fom Proyëkt Hunsrik.
FRIILINGS FËST
Te winter khomt ans ën.
Ti kriine plëter tuun xon noch mool ales tëke un ti feel singe soo fiil tas mer sich mool pisye ruich hale mus fer se aan heere.
Tas is musik fer unser seel!
Sëtst aych mool unich ti peem ploos fer ti feel opsërweeere.
Mëyer, ti kluuche mënxe, hayt tsu taach hon khee mee tsayt fer uns mit te natuer ferhale un sayn ëfëkte pëser penutse.
Fer ti kesuntheet fon unser psykee un fer unser kayst xtërke un krëftich mache.
Soo fiile kaape, kexënke woo Hërkot uns këpt, fer ti xeenhayt in unser leewe pringe.
Ti xeene sune unerkëng mit roose roote farwe, fer sayne liipe uns tsayche un këwe; mit plaue farwe fer sayn kraft uns këwe, mit kolt keele farwe fer sayn wisheet uns lërne.
Soo, ti kans natuer macht fëst fer ti friilings tsayt ap hoole. Xon fer tausënte yoore fayert ti mënxheet aach tas friilings fëst. Kraat tëswëche, is aach tsayt fer se planse, ti soome in ti ëyert tuun. Is tsayt fer nay leewe, naye sentimënte. Yeetes yoer khëne mer uns renoweere, wii ti natuer, mit frixe winxe, frixe pleen, fer uns se ferpësere, un aach fer hëlfe unser wëlt ferpësere.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI und Kolumnistin bei www.brasilalemanha.com.br. E-Mail: equiphunsrik@gmail.com.