Xon es 3ª yoer te ray noo, is te Proyekt Hunsrik inkelaat kep fer te 19ª Festiwal “Mir Redde Platt” in Sarreguemines-Lothringen, in Frankraych.
Tas yoer, woo te theema waar “Ti Plat Xprooch is iweraal uf te xtroos” hon ti layter en ferpintung kemach mit em xtaat Elsas fer unser xprooch wayter hale un te Festiwal ferprayte.
Isabelle Schoepfer, ti kultural xëf fom naye xtaat woo kekrint kep is, West-France, woo ti xtaate Lothringen-Elsass-Champagne-Ardennes umfast, un Hervé Atamaniuk, woo te Festiwal kekrint hot, waare ti fiirer fon en “Debat” mit inkelaatne persoone woo mit unser xprooch xafe un aach jornaliste, fer ferxiitne phunkte tiskutiire iwer te futur fon te Hunsrik-Plat Xprooch.
Tan, am 29 mërts, mitwoch moynts, hate mer en trefung mit jornaliste fon Strasbourg, haupt xtat fom xtaat Elsas un aach ti Kapital fon te União Européia. Ti jornaliste hon uns fiil tings kefroot, awer wii ich ti reportaajes keleest hon, hon ich kesiin tas tii aach forxunge ore pesquisas kemach hon iwich uns, xermaanixe inwanerer un nookhomer un iwich unser kemaynte im Brasil, un aach iwich unser histoorixe kexichte.
Un tii hon sich fiil ferwunert iwich ales was meyer hier fërtich keprung hon.
Fer mitach mache, sin mer aus kang uf en xeen plats fer se ese un en kuute wayn ketrunk. Ti xëf Isabeelle waar soo froo wayl sayn moter xprooch is aach unsere taytx un meyer khonte aarich fiil mitsamer fertseele, sokaar en xpruch woo ich fon mayn mama kelërnt hon, un sii hat tas selwiche fon sayn wowo kelërnt kehat, was meyer tswaay mitsamer fer ti jornaliste foer kesaat hon:
“Tas is te taume,
Tee xitelt ti flaume
Tee reft se uf,
Tee traat se hëm
Te kleene frest se al”.
Noo mitach, is tan aychentlich te “Debat” paseyert, wan tan mee layt khom sin, wii leerer, xraywer un layt woo mit kultur xafe.
Tas waar en kans importante momënt , wayl tas haupste, was tëne kanse layt khimere tuut, kraat soo wii hier pay uns im Brasil is “WII UNSER XPROOCH LEWENT HALE UN TI YUNGE SICH WAYTER INTERESEERE MACHE AN UNSER XPROOCH”.
Meyer hon phaar kuute antworte mit keprung un hofe tas ales peaarwate khëne torich unsere Proyekt, mit em hilef fon te miitias un fon layt woo sich intereseere in unser kultur net aus xtërwe lose, un ekstra, ayre hilef, liipe heerer, in unser xprooch wayter xpreche un fer ayre khiner un ënkels khiner wayter lërne, wayl ti importans fon en xprooch khan kemes kewe torich sayn penutsung un soo lang wii naye wërter rin khome, wayl ti xprooche sich atapteere mise an ti naye tsayte.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com