Radiosendung AHAI 1081 – Die deutsche Stunde der Gemeinden – Kommentar HUNSRIK
Haloo, hier is Solange Hamester Johann, fom Proyëkt Hunsrik
PUCH MËSE IN SARREGUEMINES/FRANKRAYCH:
Uf tee aarich xpëtsieel “Feira do Livro”, woo ploos aarwate in unser xprooch prësentëyert këwe, hon mer fiile autoore, jornaliste, ratialiste, musikante, komponiste, poëte un picher xraywer ketrof. Tii hon sich mëchtich ferwunert tas hii noch soo fiil layt unsere taytx xprëche.
Mëyer hon
– Hër Hervé Atamaniuk ketrof, Kultur Tirëktor fon te xtat Sarreguemines, orkanisator fom Festiwaal “Mir reete Platt,” komponier in Hunsrück / Platt un xpiilt en alte un sëltene musik instrumënt. Prësëntëyert sich, mit sayne musik krupe ploos in aarich xpëtsieele fëste.
– Profª. Edith Braun, mit 94 yoer, linkwist, autoorin fon en tiksionaar in te Hunsrück Xprooch/Platt, hot en ilustriert poesii puch noch mool aus këp un is aach iwersëtser fom Kleene Prinz in te Hunsrück Xprooch fon Taytxlant. Hayt tsu taach is se kolunist fon te “Saarbrücken Zeitung”, imer naychkheete am pringe iwich unser xprooch.
– Marianne Haas-Heckel, iwersëtser fom puch Te Kleene Prins uf ti Platt Xprooch fon Lothringen (Lotaringia ore Lorena), xtaat woo hayt tsuu taach tsu Frankreich kehëyert , woo awer frier tsu Deutschland kehëyrt hot.
– Prof. Mateusz Maselko, Linkwist fon Wien-Österreich, Leerer an te Uniwersiteet Genf ore Genebra, woo sayn Mayster Aarwat iwich unser Hunsrik Xprooch im Rio Grande do Sul kemach hot. Hot aach eene sientifik artikel fon 30 sayte iwer unser khiner wërter puch “Mayn Ëyerste 100 Hunsrik Wërter” an te Uniwersiteet fon Barcelona puplitsëyert un noch en anere mit 10 sayte in te Linkwistik Tsaytung fon Rumeenien, woo unser xprooch aach noch kexproch wërt. Fer neekstes yoer, sol ëyer en Forum orkaniseere iwich unser Hunsrik Xprooch uf em Festiwaal “Mir redde Platt”/2016, mit unserer partnerschaft. Hayt tsu taach is te Leerer Mateusz Doktorant xtuutium am mache mit unser hilef un fon te aarwate fom Proyëkt Hunsrik.
– Hër Dieter Zimmer, iwersëtser fom Noye Tëstamënt fer ti Hunsrück Xprooch in Taytxlant mit te xriftliche reechle fom Proyëkt Hunsrik/Brasil, hot stols sayn aarwaat ketsaycht uf tee Puch Mëse.
Kans froo sin mëyer mit em resultaat fon unser pesuuch noo Sarreguemines, un ti neekst woch tuun mer aych wayter fertseele ales kuutes was tort pasëyert is.
Xeene kruus aus Thee Walt.