Foriches yoer, iwer te yuuli moonat, hon ich iwer ti kexichte fon te Feitoria do Linho Cânhamo kexproch un hon tan xlus kemach am informeere iwer ti xlechte konserweerung kontitsioone fon tee alt kepau un fom risk tas te tach runer preche teet, motiif fer ti wanerung fon te kleene artikle woo too uf kehoop waare noo em Museum Visconde de S.Leopoldo.
Ti trajëëtia woo sich soo lang aankesaat hat, is ti letst woch paseyert: en kroos tayl fom tach un ti tswaay sayte wënt sin runer keproch, un meyer al, xermaanixe nookhomer, sin am layte weche em weeniche ore kaar khee interese mit te kexichte fon unser folek. Im kansem, unser Lant tuut sich tsuu weenich khimere mit sayn kultur un sayn histoorixe kexichte.
Te Xtaat Konseel fer Kultur, torich te Face sayte fom Konselier Jorge Stocker, woo ti Noot unertsaychent mit em Presitënt Marco Aurélio Alves, tuut aach sayn traurichkheet mit tee xlecht naychkheet manifesteere wën en tayl fon tëm important kepau, pekhant als Imikrante Haus ore Feitoria, im Munisip São Leopoldo niter khomt.
Tas kepau is tsayt mërts 1982 als historixes ërepxaft fom RS inkefiert. Sayn kulturaale weyerte hon en hooch petaytung, un is en referëns fon te alte xermaanixe kholonie São Leopoldo fer ti kans Teuto-Brasiliaanix Kemayntxaft.
Noo yoore woo tas neewe kelos kep waar un oone foer erhalung, siit mer kans klaar ti prekaare politik fer ti erhalung fon te kulturaal ërepxaft in ale rechiirungs xtele: munisipal, fom xtaat un federal fer ales was mit kulturaaliche manifestatsioone se tuun hot, ekstra fer uns, ti umkefeyer 40 inwanerungs foleke fom Brasil.
Meyer tënke tas ploos anere foleke fom Brasil sayn rechte kriin, awer wën mer mit tëne xpreche tuut, heyert mer aach ti selwiche reklamatsioone, wayl iweraal fale ti histoorixe kepaus um, wii te Pelourinho in Salvador, te Natsionaal Museum im Rio de Janeiro, unser Imikrante Haus in S.Leopoldo, usw.
Im hiin plik uf tas Feitoria Haus, importanteste simpool fon te xermaanix
inwaneerung, fer tas witer uf paue, mise ti rechiirunge un tas folek fom Rio
Grande do Sul en xnel ore aylich solutsioon fine, wayl feele weenicher wii
2.000 taache fer tas 200 Yoer Fayrung fon te Inwanerung, in 2024.
Xeene, awer trauriche, Kruus aus Thee Walt, tas letste un wayteste lant
woo pewoont kep waar in te alt Kholonii São Leopoldo.