Radiosendung AHAI 981 – HUNSRIK (südamerikanisch-hunsrückischer Dialekt)
Haloo, hier is Solange Hamester Johann, fom Proyëkt Hunsrik.
TE FUTUUR PLEENE
En kroose futuur pleene is unser flicht. Was mer nii ketreemt hot, tas tuut
ach nët paseere.
Soo, sin mer kans froo mit ales was mer xon fërtich keprung hon in te
aarwat fer unser xprooch leewent hale, tsayt feepruer/2004, noyn yoer woo
mer xafe:
a.En xrift mache, wayl unser xprooch halt sich xon tausent (1.000)yoer
leewent oone xrift; tas hon mer fërtich keprung mit em SIL –Sociedade
Internacional de Lingüística, woo uns tray linkwiste kexikt hot. Ti haupst,
Dra. Úrsula Wiesemann, hot finef(5) yoer im Thee Walt kewoont fer tii
aarwat se mache.
b.Unser xermaanix xprooch, TE HUNSRIK im ETHNOLOGUE –
eensichste orkaan fon te UNESCO woo ti xprooche katalokisiert, in
xraywe. Tas hon mer xon kemach kriit in teetsëmper/2007.
c.In mërts/2009, en Tekrët fom Thee Walter Prefëkt woo uns erlaupnis këpt
fer 50% unsere taytx mit te khiner in te xuule xprëche.
d.Neekst traysich(30) Feiras do Livro, ore Picher Woche Market, woo mer
xon mit kemach hon in te kans rechioon, un tray yoer te ray noo uf te Feira
fon Porto Alegre, woo mer unser picher ausketeelt hon un unsere Proyëkt
pekhant kemach.
e.Khomentaar im Raatio Prokram AHAI, woo uns soo wayt un prayt
pekhant macht, tsayt noofëmper/2010.
f.In akust/2011, fënge mer aan xuul se hale fer khiner fon te elementaar
xuul, fom Pré pis 5º klas.
g.Piipel iwersëtsunge, in importante partnerxafte mit te SBB un noch anere
orkanisatsioone, was xon tswaay picher këp hot un fiile proyëkte mit
khëriche, raatios un xuule.
h.In april/2012 khomt em khomitiif fom Espírito Santo unser materiaale
hole fer tat aach aanfange xuul se hale in te Hunsrik xprooch.