Ferkest mer tas mer khëner unser leewe pisye laychter mache. Soo, pringe ich soo phaar kleenichkheete woo unser leewe helfe sole:
Mich selwer iwer kuut uf pase;
Tas kliklichste persoon fon te welt sin;
Yeete momënt richtich erleewe;
Jinastik mache;
Koraaj hon fer sich selwer ferënere;
Khee tsayt ferleere mit tumheet;
Mayne ritmus rexpekteere;
Ticht pay mayn froynte playwe;
Tas leewe fayre;
Aler oportuniteete penutse;
Nay tings lërne;
Fer yemant nitslich sin;
Etwas mache tas ich mayn opjektiife noo khome;
Etwas mache, anxtat mich peklaache;
Mich selwer fertsaye, wën ich was ferkheyertes kemach hon;
Oone tumheete ore uneetichkheete leewe;
Kuut penutse ales was ich am mache sin;
Kans an mich selepxt klaawe;
Etwas fërtich pringe, un noch mool fersuuche wën es net richtich kep is;
Mayn rechte pexitse ore tefenteere un mayn flichte tuun;
Peete;
Te kuute humor imer hooch hale;
Naychkheete proweere;
Ales eenfach mache ore simplifikeere;
Sich en kesunt leewe mache
UN Ti layt liipe soo wii mer mooye niks mer foer hët.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com