Te Faters Taach is eene fon tëne momënte woo tiine fer unser ferpintunge xtërkere un kliklichkheet samer tseele
En papa is en fiirer iwer unser rees: Er heleft te peste weech aus suuche, kept komfort un tuut uns wëërme, kept xitz un sicherheet in te xwiirichste momënte fom leewe.
Sayn important ferpintung erkhëne is ti kreest peloonung woo en fater un sayn khint in sayn leewe khëne hon.
Xon im mite weech, hon ich kelërnt se klaawe an was ich tuun mit mayne fater sayn fikuur in te ketanke, tee woo, iwer ales, mich imer muut kep hot, weyert kep hot fer mayn aarwat un hot mayn flichte mich ketsaych.
Soo sin ti eltre, es kept khee wërter fer se pexraywe was meyer xpiire, wën meyer ferxteen ti kroose opfere woo tii mit kemach hon fer uns kroos se tsye un uns pilte.
An tëm xpetsiaale taach, wole meyer ale eltre eere, ti woo payxpiil fon liipe, xuts, kraft un fiirung sin fer sayn khiner. Tier het unser erkhënung fer tii noopel misioon woo fer aych ap kep waar.
Tanke xeen, papa, wayl tuu tas licht pist woo imer mayne weech laychte tuut; wayl tuu mich ferxteen machst tas ich tas licht sin mus im leewe fon mayn khiner.
Tanke xeen, papa, tas tuu yemant pist woo ich mich truf xtols fiile khan;
yemant woo ich soo fiil se tanke hon, un, ekstra, yemant woo ich soo fiil liipe tuun.
Xeene kruus aus Thee Walt.
*Solange Hamester Johann ist die Leiterin vom Proyëkt Hunsrik in Thee Walt, Santa Maria do Herval, RS, Kommentatorin der Radiosendung AHAI – Die Deutsche Stunde der Gemeinden – Block 04 und Kolumnistin bei www.brasilalemanha.com.br. E-Mail: equipehunsrik@gmail.com
Audio dieses Kommentars –AHAI bl 04